Երեկ ԱԺ-ում համաներման քննարկման ժամանակ պատգամավորների կողմից հնչեցվեցին մի քանի դիտողություններ, որոնք վերաբերում էին նախագահի կողմից կատարված առաջարկություններին:
Այսօր ԱԺ նիստին արդարադատության նախարար Հրայր Թովմասյանը ներկայացրեց, թե որ առաջարկություններն են ընդունվել: «Նախագծի 5-րդ կետի 2-րդ ենթակետի 3-րդ բառը փոխարինվել է «մեկ քառորդի»-ով: Հիշեցնեմ, որ այս առաջարկությունը հնչեցրին ՀՀ ԱԺ պատգամավորներ Սուքիաս Ավետիսյանը, Կորյուն Նահապետյանը և Ռաֆիկ Պետրոսյանը: Սա վերաբերում է անզգույշ հանցագործություն կատարելու համար պատժի մեկ քառորդը կրելուց հետո ազատվելուն: Ունենք հավասարության նշաններ` դրված դիտավորյալ հանցագործություն կատարելու և անզգույշ հանցագործություն կատարելու միջև: Երկուսի պարագայում էլ նախատեսված էր «մեկ երրորդ»: Սակայն, հաշվի առնելով այն հանգամանքը, որ անզգույշ հանցագործությունների դեպքում ավելի մեղմ մոտեցում պետք է ցուցաբերվի «մեկ երրորդ»-ը փոխարինվել է «մեկ քառորդ»-ով:
Նախագծի 5-րդ կետի 4-րդ ենթակետում «հունիսի 31»-ը փոխարինվել է «օգոստոսի 21»-ով: Այսինքն` երկարացվել է այն ժամկետը, որի ընթացքում հետախուզման մեջ գտնվող անձինք կարող են ներկայանալ, և ներկայանալուց հետո նրանց գործը կկարճվի:
Նախագծի 16-րդ կետում «հունիսի 30»-ը համապատասխանաբար փոխարինվել է «սեպտեմբերի 21»-ով, ինչը վերաբերում է 60 տարեկանը լրացած անձանց:
Նախագծի 16-րդ կետում «մայիսի 1»-ը փոխարինվել է «մայիսի 10»-ով: Սա էլ վերաբերում է, ըստ էության, տվյալ պահի դրությամբ հաշմանդամ ճանչված անձանց: Առաջարկությունների մյուս մասը վերաբերում էր բացառություն համարվող հոդվածների շարքին, որոնց վրա չի տարածվում համաներումը հանելու «տրանսպորտային վթարների արդյունքում երկու և ավելի մահ առաջացրած դեպքերին»: «Հաշվի առնելով, որ սրանք ևս անզգույշ հանցագործություններ են, ապա բացառությունների շարքից, որոնց վրա չի տարածվելու համաներումը, այս հոդվածով կատարված հանցագործությունները ևս հանվել են: Սա նշանակում է, որ այն անձանց վրա, որոնք դատապարտվել են այս հանցագործությամբ կտարածվի: Բայց այս պարագայում, հաշվի առնելով նրանց պատժի մեծ չափը, ենթադրվում է, որ նրանց պատժաչափը կկրճատվի: Այսինքն՝ նրանք ամբողջությամբ ազատազրկումից չեն ազատվի»:
