Այսօր ֆինասների նախարար Վաչե Գաբրիելյանը, պատասխանելով լրագրողների հարցերին, հայտարարեց, որ ճգնաժամն ավարտվել է, իսկ ներկա պահին իրենք ճգնաժամի հետևանքներն են հաղթահարում:
Նրա խոսքերով՝ բյուջեի կատարողականը մանրամասնորեն ցույց է տալիս, թե ինչպիսին են եղել նախորդ տարվա արդյունքները, թե՛ եկամուտների, թե՛ ծախսերի մասով: Իսկ էական թերակատարումներ նախորդ տարվա պետբյուջեի կատարողականում կառավարությունը չի տեսնում:
«Կարծում եմ, որ անցած տարվա արձանագրված տնտեսական աճը մենք կունենանք նաև այս տարի և ինչպես մենք ասացինք՝ կայուն տեմպերով տնտեսության վերականգնման տարի էր: Մեզ մոտ ճգնաժամն ավարտվել է, ճգնաժամի հետևանքները դեռևս հաղթահարում ենք: Դա երկարատև տնտեսական պրոցես է և կառավարությունը բոլոր ջանքերը գործադրելու է այդ ամենը հետևողական կերպով արագացնելու և առողջ ու բազմազան տնտեսություն ու տնտեսության զարգացմանն աջակցող պետական ֆինանսներ ունենալու համար: Մենք կունենանք տնտեսական աճ և գնաճի ցածր մակարդակ: Կարծում եմ, որ գյուղատնտեսությունը չի կրկնի անցած տարվա հետագիծը: Մենք կարող ենք ենթադրաբար ասել, որ այս տարի ևս կլինի աճի տարի: Մենք կունենանք տնտեսական աճ և տարվա վերջում գնաճի ավելի ցածր մակարդակ»,- հայտարարեց նախարարը:
