«Առաջին լրատվական»-ի զրուցակիցն է ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը, ով ՀՀԿ համամասնական ցուցակի 45-րդ համարն է զբաղեցնում:
-Պարոն Սահակյան, ՀՀԿ համամասնական ցուցակի 45-րդ հորիզոնականն եք զբաղեցնում: Մոտ երկու տասնյակ ՀՀԿ-ականներ ընդհանրապես չկային ցուցակում, մի մասին էլ այնպիսի տեղեր են հատկացրել, որ դուրս են թողնում խաղից: Տեսնում ենք, թե Կարեն Ավագյանին և մյուսներին որ հորիզոնականն են հատկացրել, Ձեզ՝ որ: Ձեզ համար անակնկա՞լ էր, թե՞ ոչ այդպիսի հորիզոնականում հայտնվելը: Ստացվո՞ւմ է արդյոք, որ Ձեր աշխատանքից ուղղակի դժգոհ են եղել:
-Բազմիս ասել ենք, որ կուսակցության ղեկավարը, քննարկելով գործադիր մարմնի հետ, որոշում է, թե ով որտեղ է պետք: Եվ կարծում եմ՝ նաև դուք կարող եք ասել՝ այս ընթացքում լավ եմ աշխատել, թե ոչ: Մի փոքր որ համբերեք, ամեն ինչ լավ կլինի: Ամեն ինչ նորմալ է: Եթե գրել են այդ հորիզոնականում, ուրեմն պետք էր, որ գրեին այդ հորիզոնականում, իմ գործընկերներին՝ Կարեն Ավագյանին, մյուսներին էլ նմանապես, հետևաբար պետք չէ գոնե ընկերների մեջ նման պրովոկացիոն հարցադրումներ հնչեցնել: Մենք թիմ ենք, որտեղ յուրաքանչյուրն իր դերակատարումն ունի, և թիմի ղեկավարին ավելի տեսանելի է, թե թիմի որ անդամը որտեղ ավելի պիտանի կլինի 2017-ից հետո: Հետևաբար, կարծում եմ՝ ամեն ինչ նորմալ է:
-Հայկ Բաբուխանյանին ու Արտաշես Գեղամյանին էլ եք Ձեր թիմից համարո՞ւմ…Նրանք Ձեզնից բավական առաջ են ցուցակում:
-Ես չէի ուզենա, որ մենք անվանական քննարկենք մեր թիմի որևէ անդամի հորիզոնականը, կատարած աշխատանքը, որովհետև ես այդ հարցին պատասխանեցի:
-Ձեր թիմում ո՞վ է որոշում կայացնում, կուսակցության նախագա՞հը…
-Կուսակցության նախագահը՝ գործադիր մարմնում քննարկելով:
-Ձեզ կտեսնենք գործադիրո՞ւմ:
-Ես երբևէ չեմ նշել կամ չասացի գործադիրում: Այլ աշխատանքի, վստահաբար, կտեսնեք, թե որտեղ կտեսնեք, դա էլ էլի թիմի ղեկավարը կորոշի:
-Լոռու մարզում ռեյտինգային ցուցակով առաջադրվածներից ո՞ւմ եք աջակցելու:
-Աջակցում ենք հանրապետականին, և Սպիտակի շրջանի ժողովուրդը վստահաբար աջակցելու է հանրապետականի թեկնածուներին: Հաշվի առնելով, թե որ թեկնածուն որտեղ է ավելի ընդունված, գործ է կատարել, ավելի ընկալելի կլինի այդ շրջանի այդ հատվածի համար, այդտեղ էլ այդ քարոզչությունը կանենք այդ թեկնածուի օգտին:
-Ամեն դեպքում թեկնածուների մի մասը դո՞ւրս կմնա՝ հաշվի առնելով ընտրապայքարը:
-Ընտրությունների կանխատեսումներով չզբաղվենք, քանի որ դա անշնորհակալ գործ է, ինչպես բազմիցս մենք տեսել ենք: Հետևաբար զինվենք համբերությամբ, և կտեսնենք, որ ամեն ինչ նորմալ կլինի:
-Ձեզ եթե առաջարկեին ռեյտինգայինով, կառաջադրվեի՞ք:
-Որպես կարգապահ կուսակցական՝ նորից եմ նշում՝ իհարկե պատրաստ եմ կուսակցության ցանկացած որոշման: Իհարկե, ինձ հետ քննարկվել է նաև ռեյտինգայինի հետ կապված: Հաշվի առնելով տակտիկական և այլ խնդիրներ, թե որ դեպքում կուսակցության համար ավելի լավ կլինի, նման որոշում է կայացվել:
-Ձեր ցուցակը քաղաքակա՞ն եք համարում: Նշվում էր, որ երբ հրապարակվի կուսակցության համամասնական ցուցակը, կտեսնենք, թե ինչ քաղաքական դեմքեր են: Շատերը հիմա նկատում են, որ ցուցակում օդիոզ դեմքերը շատ ավելի քաղաքական են, քան համամասնական ցուցակում ընդգրկվածները: Ինչպե՞ս եք Դուք գնահատում:
-Կարծիք է, կարող է գոյություն ունենալ, ես չեմ կիսում այն: Մեր համամասնական ցուցակն այն ցուցակն է, որը ներկայացրել ենք, և որով էլ փորձում ենք գնալ ընտրությունների, և շատ ավելի բարդ կլինի, երբ կմտնենք բուն քարոզարշավի փուլ և այնտեղ ամեն ինչ շատ ավելի հստակ կդառնա:
-Ցուցակում յուրաքաչյուրի տեղն ի՞նչ չափանիշներով է որոշվել՝ ըստ կատարա՞ծ աշխատանքի, ըստ ՀՀԿ-ին նվիրվածությա՞ն:
-Ես չեմ կարծում, որ ըստ աշխատանքի գնահատականի են ներկայացված կամ չափանիշը միայն դա է: Նորից եմ նշում, որ թիմի ղեկավարի և գործադիր մարմնի ղեկավարությանն ավելի տեսանելի են, թե թիմի որ անդամը որտեղ կարող է ավելի արդյունավետ գործել 2017-ի ԱԺ և 2018-ի վարչապետի ընտրություններից հետո:
-Ըստ Ձեզ՝ որքա՞ն է Ձեր արդյունավետության գործակիցը ԱԺ-ում, Դուք ղեկավարում էինք ամենակարևոր հանձնաժողովներից մեկը՝ պետաիրավական հարցերի մշտական հանձնաժողովը:
-Պետաիրավական հարցերի հանձնաժողով ղեկավարելով՝ գոնե վերջին չորս ամիսը բառիս բուն իմաստով քնել ենք ԱԺ-ում կամ պակաս ակտիվություն չենք ունեցել: Հետևաբար, նորից եմ նշում, ոչ թե կատարած աշխատանքի ակտիվությունը և արդյունավետությունն է չափանիշը, այլ տարբեր չափանիշներ՝ հաշվի առնելով ունակությունները, գիտելիքները, փորձը այլ ոլորտներում, որպեսզի նաև հետագայում կարողանանք դրսևորել և այդ փորձը կարողանանք կյանքի կոչել: Եթե իմ մասին եք մտահոգվում՝ ամեն ինչ շատ լավ է լինելու, հատկապես Ձեր՝ լրագրողներիդ սրտով է լինելու, որ չսրտնեղեք:
-Ազգային ժողովը եւ քաղաքական գիծն արդեն պլանավորվում է ըստ ընտանիքների, հայրեր և որդիներ են լինելու: Ինչպե՞ս եք գնահատում:
-Ո՞ւմ նկատի ունեք:
-Սահակյաններին, Բաբլոյաններին…
-Գալուստ Սահակյանի որդին՝ Արման Սահակյանը, երբ մտել եմ քաղաքական դաշտ և եղել եմ կուսակցության մեջ, եղել է կուսակցության մեջ և կարևոր դերակատարում է իրականացրել, և այստեղ որևէ խնդիր չեմ տեսնում: Հիմա եթե Գալուստ Սահակյանի որդին է, հնարավորություն ունի Աջափնյակում շատ ձայներ հավաքելու, չպե՞ տք է մասնակցի ընտրություններին: Նույնը Արա Բաբլոյանի որդու դեպքում:
-ՏԻՄ ընտրություններից՝ Վանաձորում գրանցած արդյունքներից հետո իշխանությունը դասեր քաղե՞լ է, այլ կե՞րպ է պատրաստվում այս ընտրություններին, թեկնածուներ են, որոնք լուրջ մրցակից են իշխանությանը:
-Լոռու մարզում մենք ունենք բավականին բարձր ակնկալիքներ, որովհետև մեր թեկնածուները ի վիճակի են հանրության վստահությունը շահել և ստանալ այդ ձայնը:
Լուսանկարը՝ aravot.am-ի
