Ֆինլանդիայի և Նիդեռլանդների հետազոտողները նոր տվյալ են ստացել, որոնք խոսում են հօգուտ նրա, որ երեխան ծնվելուց մի քանի շաբաթ առաջ ունակ է հիշել որոշակի բառեր: Մի քանի գիտաբժշկական կենտրոնների, այդ թվում Հելսինկիի համալսարանի մասնագետներն ուղեղի էլեկտրական ակտիվության անալիզի միջոցով կարողացել են ապացուցել հիշելու ունակությունը նորածինների մոտ: Այս մասին հաղորդում է Science News-ը՝ վկայակոչելով Proceedings of the National Academy of Sciences ամսագրում հրապարակված գիտական հոդվածը:
Փորձի սկզբում հղի կանայք լսել են հատուկ կազմված աուդիոձայնագրություն, որի երաժշտական մասերում կրկնվել է «տատատա» բառը, որն իմաստային ծանրաբեռնվածություն չունի:
Ծննդաբերությունից հետո, օգտագործելով էլեկտրաէնցեֆալոգրաֆիայի մեթոդը, ուսումնասիրվել է նորածինների ուղեղի ակտիվությունը: Այնուհետև գիտնականները կրկին միացրել են ձայնագրությունը՝ գրանցելով էլեկտրական ակտիվության փոփոխությունները: Նույն փուլում համանման ուսումնասիրություն են արել երեխաների մոտ, որոնք չեն լսել ձայնագրությունը հղիության ժամանակ, որից հետո գիտնականները համադրել են դրանք:
Այդ համադրությունները թույլ են տվել պարզել, որ ի պատասխան «տատատա»-ի՝ ուղեղն արտադրում է մի շարք ալիքներ՝ նման նրանց, որոնք նախկին էլեկտրաֆիզիոլոգիական փորձարկումներում գիտնականները կապում էին ծանոթ հնչյունները ճանաչելու հետ:
