Այսօր ԱԺ-ում 2010 թ. բյուջեի կատարողականի վերաբերյալ հաշվետվությունը ներկայացնելիս ՀՀ վարչապետ Տիգրան Սարգսյանն ասել է, թե 2010 թվականին ինչ ենթակառուցվածքներ են «զարգացել»:
«Մասնավորապես 2010 թվականի ընթացքում կատարվել են շուրջ 350 կմ երկարությամբ ճանապարհահատվածների վերանորոգման աշխատանքներ, այդ թվում` 224 կմ-ը` ներգրավված վարկային միջոցների հաշվին, իսկ 126 կմ-ը` պետական բյուջեի ֆինանասավորմամբ:
• 2010 թվականին հիմնանորոգվել են 8 կամուրջներ: Այդ թվում պահուստային ֆոնդի միջոցներով իրականացվել են բնական և արհեստածին աղետների հետևանքով վնասված 44 ճանապարհահատվածների վերականգնման, ինչպես նաև 9 ճանապարհահատվածների և 5 կամուրջների հիմնանորոգման աշխատանքներ՝ շուրջ 5.6 միլիարդ դրամի չափով:
• 2010 թվականի ընթացքում կառուցվել և վերանորոգվել է 901 կմ խողովակաշար. սա աննախադեպ ծավալ է կազմում, որից խմելու ջրի ջրագծերը կազմում են 697 կմ, կոյուղու կոլեկտորները՝ 23 կմ (5 քաղաքներում), իսկ ոռոգման ջրանցքները և ջրատարները՝ 181 կմ:
• 2010 թվականին կատարվել են դրենաժների մաքրման և խորացման աշխատանքները ընդհանուր 346 կմ երկարությամբ:
• Ճապոնիայի կառավարության վարկի հաշվին 2010 թ. շահագործման է հանձնվել Երևանի ՋԷԿ-ը:
• ՀՀ կառավարության և Ճապոնիայի միջազգային համագործակցության գործակալության միջև կնքված պայմանագրի համաձայն` 2010թ. սեպտեմբերին ամբողջությամբ ավարտվել են թվով 17 110 կվ ենթակայանների վերականգնման աշխատանքները:
• 2010 թ. ապահովվել է 3G ստանդարտով գործող համակարգերի շահագործումը Հանրապետության ողջ տարածքի ծածկույթով: Ինչպես նաև առաջին անգամ Հայաստանի Հանրապետությում գործարկվել են 4G սերնդի կապի տեխնոլոգիաներ:
• 2010 թվականի ընթացքում արագագործ ինտերնետի միջինացված մանրածախ սակագները գրեթե կրկնակի նվազել են: Ինտերների մեծածախ սակագները կրճատվել են 2 անգամից ավելի՝ կազմելով 71000 դրամ, և այս միտումը շարունակվում է նաև այս տարի: Ինտերնետից օգտվողների ընդհանուր թվաքանակը (ներառյալ նաև բջջային հեռախոսների միջոցով օգտվողները) 2010 թվականին կազմել է 1.5 միլիոն, իսկ լայնաշերտ ինտերնետի բաժանորդների քանակը աճել է գրեթե 2.5 անգամ` կազմելով 173 հազար:
• Ինտերնետը 2010 թ. հասանելի է դարձել ևս 300 դպրոցում: Ընդհանուր առմամբ, այսօր ՀՀ 944 դպրոց արդեն ապահովված է ինտերնետ մուտքով:
• ՀԲ-ի վարկային ծրագրի շրջանակներում 2009-2010 թթ. ընթացքում իրականացվել են 8 մարզային բժշկական կենտրոնի արդիականացման, հիմնովին վերանորոգման, նորագույն բժշկական սարքավորումներով և կահույքով հագեցման աշխատանքներ, ավարտվել են 5 բժշկական կենտրոնների մասնաշենքերի հիմնանորոգման աշխատանքները, ավարտին են մոտենում Ապարանի բժշկական կենտրոնի հիմնանորոգման աշխատանքները: 2010 թ. սկսվել և ընթացքի մեջ են Գավառի բժշկական կենտրոնի ծննդատան շենքի հիմնանորոգման և Գյումրիի նոր բժշկական կենտրոնի կառուցման աշխատանքները:
• 2010 թ. ընթացքում գյուղական համայնքներում կառուցվել է 10 նոր և վերանորոգվել 20 համայնքային ամբուլատորիա, ինչպես նաև տրամադրվել են ժամանակակից բժշկական սարքավորումներ: Ընդհանուր առմամբ, մարզային հիվանդանոցային համակարգում 2009-2010 թթ. ընթացքում իրականացվել է շուրջ 17 մլն ԱՄՆ դոլարի ներդրում, որից 4.4 մլն ԱՄՆ դոլարը՝ նորագույն բժշկական սարքավորումների և կահույքի մասով:
• Երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով աղետի գոտու բնակարանային շինարարության ծրագրի շրջանակներում ավարտվել են Գյումրի քաղաքում 1056 բնակարանից բաղկացած 22 բազմաբնակարան շենքերի աշխատանքները: Սպիտակ քաղաքում շահագործման է հանձնվել 220 բնակելի տուն, իսկ ՀՀ Լոռու մարզի գյուղական բնակավայրերում կառուցվել է 303 բնակելի տուն: Դրա հետ մեկտեղ սկսվել է Գյումրի քաղաքում 1756 բնակարանից բաղկացած 38 բազմաբնակարան շենքերի և Լոռու մարզի գյուղական բնակավայրերում 375 բնակելի տների շինարարությունը:
• ՀՀ 2010 թվականի բյուջեի հաշվին 5.3 մլրդ դրամ գումարի շրջանակներում իրականացվել են 154 օբյեկտների կառուցման և հիմանորոգման աշխատանքներ»,- նշել է վարչապետը:
