Եգիպտոսը վերջնական որոշում է կայացրել առաջիկա շաբաթ օրը բացելու Պաղեստինի հետ սահմանը՝ դրանով դադարեցնելով 2007 թ. նախկին ռեժիմի որոշմամբ սկսված Գազայի հատվածի շրջափակումը: Այս մասին հաղորդում է MENA լրատվական գործակալությունը:
BBC-ի փոխանցմամբ, «Ռաֆահ» անցակետը մայիսի 27-ից բաց է լինելու ժամը 9-21-ը՝ բացի տոնական օրերից և ուրբաթ օրվանից, որը մուսուլմանական աշխարհում հանգստյան օր է համարվում: Սահմանը հատելու համար այլևս անհրաժեշտ չի լինի մուտքի արտոնագիր ստանալ: Այդ արգելքը հանվել է բոլոր կանանց, ինչպես նաև 18-40 տարեկան տղամարդկանց համար:
Հիշեցնենք, որ Մուբարաքն Իսրայելի հետ ստորագրված համապատասխան փաստաթղթով փակել էր սահմանը Գազայի հատվածի հետ` այդպիսով արձագանքելով այնտեղ իշխանությունը զավթած «ՀԱՄԱՍ» խմբավորման գործողություններին: Եգիպտոսի ներկայիս իշխանությունների գործողությունները մեծ դժգոհություն են առաջացրել հրեական պետությունում, քանի որ մտահոգություն կա, որ սահմանի բացման արդյունքում Գազայի հատված կներխուժեն ծայրահեղական խմբավորման անդամներ, ինչպես նաև կհեշտանա զենքի անօրինական շրջանառությունը:
