Բրիտանական ռազմածովային ուժերի նավերն առաջիկա օրերին պատրաստ կլինեն միանալու ամերիկյան ուժերին՝ Սիրիայում Բաշար Ասադի իշխանության դեմ ռազմական օպերացիայի մեկնարկի դեպքում: Այս մասին հայտնում է Telegraph-ը՝ հղում անելով կառավարության աղբյուրներին:
Օպերացիան հավանաբար կկրի թևավոր հրթիռներով թիրախային հարվածների բնույթ: Թիրախների հստակ ցուցակը ներկայում հստակեցնում են երկու երկրների զինվորական հրամանատարությունների ներկայացուցիչները: Ուժային տարբերակի իրականացման համար պաշտոնական առիթ է հանդիսացել քաղաքացիական անձանց դեմ իշխանությունների կողմից քիմիական զենքի կիրառումը:
Ավելի վաղ բրիտանացի արտգործնախարարը հանդես էր եկել սիրիական կառավարությանն ուղղված նախազգուշացմամբ՝ հայտարարելով, որ Լոնդոնը, Վաշինգտոնն ու իրենց դաշնակիցները Դամասկոսին թույլ չեն տա «անպատիժ» զենք կիրառել սիրիացի ժողովրդի դեմ:
Կիրակի Մեծ Բրիտանիայի վարչապետ Դևիդ Քեմերոնը ընդհատել էր իր արձակուրդը և հեռախոսազրույցներ ունեցել ԱՄՆ-ի, Ֆրանսիայի և Գերմանիայի առաջնորդների հետ: Կառավարության աղբյուրի հավաստմամբ՝ կողմերը քննարկել են իրադարձությունների զարգացման ռազմական տարբերակը:
