Կառավարության կայքից կարելի է գտնել բյուջեից Հայաստանի բոլոր պետական գերատեսչություններին հատկացված տարեկան միջոցները և այդ գերատեսչությունների կատարած գրեթե բոլոր ծախսերը:
ՀՀ վարչապետն ու կառավարության որոշ անդամներ հաճախ են բարձրաձայնում, թե պետական բյուջեի բոլոր ծախսերը թափանցիկ են ու տեղադրված են իրենց կայքում: Եվ որ ցանկացած մարդ աշխարհի տարբեր ծայրերից կարող է հետևել, թե ինչի վրա են ծախսվում պետական միջոցները: Սակայն նույնիսկ սիրողական մակարդակով այդ ծախսերն ուսումնասիրելիս պարզ է դառնում, որ այնտեղ բազմաթիվ ծախսեր կան, որոնցից ակնհայտ կոռուպցիայի հոտ է գալիս:
«Առաջին լրատվական»-ը մի քանի անգամ արդեն ներկայացրել է, թե ՀՀ պաշտոնյաներն ինչպես են իրենց ղեկավարած գերատեսչություններից գումարներն ուղղորդում իրենց սեփական ընկերությանը: Իսկ դրա ցայտուն օրինակը Պետեկամուտների կոմիտեի նախագահ Գագիկ Խաչատրյանն է ու նրան պատկանող ընկերությունները: Մենք արդեն մի քանի անգամ գրել ենք, որ Գ. Խաչատրյանը ՊԵԿ-ի տարածքային գրեթե բոլոր ստորաբաժանումներում հրաժարվում է «ԱրմենՏել»-ի ֆիքսված հեռախոսակապից և անցկացնում է իրեն պատկանող «Յուքոմ» ընկերության ֆիքսված կապը, և առանձին-առանձին ներկայացրել էինք նման փաստերը մեկ անձից կատարվող գնումների բաժնից: Իսկ արդեն բյուջետային ընդհանուր ծախսերի մեջ այդ երևույթը նկատելի է դառնում իր ամբողջության մեջ:
ՊԵԿ համակարգին կապի ծառայությունների համար 2013 թ. հատկացված է եղել 57 մլն դրամ: Եվ երբ ուսումնասիրում ես այդ նպատակով կատարված վճարումների ցանկը, ակնհայտ է դառնում, որ այդ միլիոնների գերակշիռ մասը գնացել է «Յուքոմ»: Իհարկե, փոքր չափով կան նաև «ԱրմենՏելին» կատարված վճարումներ, բայց դրանց թե՛ քանակը, թե՛ գումարը նկատելիորեն քիչ են: Եվ եթե յուրաքանչյուր անգամ «Յուքոմին» վճարվել է 2,3 մլն, 1,1 մլն, 1,2 մլն դրամ, ապա «ԱրմենՏելի» վճարումների ցանկում նկատելիորեն փոքր գումարներ են նշված: Տպավորությունն այնպիսին է, որ ՊԵԿ-ի աշխատակիցներին հրահանգվել է անխնա զանգեր իրականացնել «Յուքոմի» կապից, որ իրենց ղեկավարի ընկերությանն այդ գերատեսչությունից հնարավորինս շատ գումար գնա:
Բացի կապի ծառայությունից, ՊԵԿ-ն այս տարի «Յյուքոմ»-ին հսկայական գումարներ է փոխանցել այլ ծառայությունների շրջանակում: Օրինակ, ընդհանուր բնույթի այլ ծախսերին հատկացված 200 մլն դրամից 34 մլն դրամն էլ այդ ընկերությանն է վճարվել՝ պարզ չէ, թե ինչ ծառայությունների դիմաց: Իսկ համակարգչային ծառայությունների համար ՊԵԿ-ն այդ նույն ընկերությանը վճարել է 15,7 մլն դրամ: Այլ ծախսերի ցանկում ՊԵԿ-ից այս տարի ևս 40 մլն դրամ է գնացել նույն Գ. Խաչատրյանին պատկանող «Ալեքսերով» ընկերությանը: Ինչպես ասում են, սա կոռուպցիայի դասական դրսևորում է:
Իհարկե, վերը նշված գումարները չեն ներկայացնում այն ամբողջական պատկերը, թե Գ.Խաչատրյանն իր ղեկավարած ՊԵԿ-ից ամեն տարի որքան գումար է հատկացնում իր սեփական ընկերություններին: Մեր նշածները դրանց մի մասն են միայն:
Սակայն «Առաջին լրատվական»-ը չի բավարարվի միայն Գ. Խաչատրյանի կողմից ՊԵԿ-ի գումարներից իրեն բաժին հանելու գործընթացն ուսումնասիրելով: Մենք կուսումնասիրենք պետական բյուջեից օգտվող բոլոր գերատեսչությունների այն ծախսերը, որտեղ նկատելի կլինեն կոռուպցիայի նման դրսևորումներ:
