Грузия Online-ի փոխանցմամբ, շատ վրացիներ զարմացած և զայրացած են ընդդիմության առաջնորդներից Նինո Բուրջանաձեի արկածախնդիր քաղաքականությունից, որը հանգեցրեց նրան, որ ոստիկանությունը ստիպված իրենց տները ցրվել չցանկացող ցուցարարներին ուժ կիրառելու միջոցով հեռացրեց այսօր կայանալիք ռազմական շքերթի հարթակի շրջակայքից:
Տարբեր հաշվարկներով, վիրավորվել է 10-40 մարդ, զոհվել է մեկ հատուկջոկատային և մեկ ցուցարար: Ոչ պաշտոնական տվյալներով՝ ձերբակալվածների թիվը հասնում է 80-ի:
Երաժիշտ Գիվի Նասարիձեն հայտարարել է, որ Բուրջանաձեն պետք է կանգնի դատարանի առջև պետական դավաճանության, հեղաշրջման փորձի և ստոր ու անպատասխանատու քաղաքականության համար:
Տեղական «Պալիտրա» ռադիոկայանին տված հարցազրույցի ժամանակ Բուրջանաձեն հայտարարել է, որ ցուցարարները «լուրջ դիմադրություն» են ցույց տվել հատուկջոկատայիններին՝ իշխանությունների գործողությունները որակելով «կեղտոտ»:
Բուրջանաձեն նաև հայտարարել է, թե տեղյակ չէ իր ամուսնու՝ Բադրի Բիցաձեի գտնվելու վայրի մասին: Այդ մասին տեղեկություն չունի նաև Վրաստանի ՆԳՆ-ը: Այսօր Թբիլիսիի հանրապետական հիվանդանոցում ոստիկանությունը ձերբակալել է Բուրջանաձեի որդուն` Անզոր Բիցաձեին:
Վարկածներից մեկի համաձայն, հանրահավաքի վայրը լքելիս հենց Բիցաձեի մեքենան է վրաերթի ենթարկել հատուկջոկատայինին, ինչի արդյունքում վերջինս զոհվել է:
Հիշեցնենք, որ Վրաստանի ՆԳՆ-ը նախապես ցուցարարներին զգուշացրել էր, որ ընդդիմության ակցիաների թույլատրման ժամկետը սպառվում է մայիսի 26-ին ժամը 00.00-ին, ինչից հետո չի բացառվում ուժի կիրառումը: