«Ժառանգության» կուսակցությունը հանդես է եկել հայտարարությամբ, որում մասնավորապես ասված է.
Այսօր Կոմիտասի 5-ի բնակիչները և նրանց աջակցող քաղաքացիական խմբերը և ընդդիմադիր քաղաքական կուսակցությունների ակտիվիստները շարունակեցին իրենց պայքարը Կոմիտասի 5 հասցեում իրականացվող ապօրինի շինարարության դեմ: Չհաշտվելով այն հանգամանքի հետ, որ շինհրապարակը պաշտպանող մի քանի տասնյակ ոստիկաններն ու կարմիր բերետավորները թույլ չեն տալիս նրանց խոչընդոտելու ապօրինի շինարարությանը, ի նշան բողոքի նրանք իրականացրեցին ինքնաբուխ խաղաղ բողոքի ակցիաներ փակելով նախ Վաղարշյան, ապա Կոմիտաս փողոցները տարբեր հատվածներում:
Սակայն ոստիկանությունը փոխանակ վերացնելու ժողովրդական դժգոհությն պատճառը՝ ապօրինի շինարարությունը, անհամարժեք և բռնի գործողությունների դիմեց քաղաքացիների հանդեպ, արդյունքում մարմնական վնասվածքներ պատճառելով բազմաթիվ երիտասարդների, այդ թվում աղջիկների: Ապա ժ 16.00-ի կողմերը ավելի քան 30 երիտասարդ ապօրինաբար բերման ենթարկվեց Արաբկիրի ոստիկանություն: Ընթացքում՝ ոստիկանական մեքենաներում նրանցից շատերը ծեծի ենթարվեցին:
Այդ ընթացքում Կոմիտասի 5-ի բնակիչների ներկայացուցիչները՝ ԱԺ «Ժառանգություն» խմբակցության պատգամավոր Զարուհի Փոստանջյանի ուղեկցությամբ ՀՀ Ոստիկանության Արաբկիրի բաժանմունքում ներկայացրեցին հաղորդում հանցագործության մասին, ըստ որի կառուցապատողները կոպտորեն խախտել են Երևանի Արաբկիր և Քանաքեռ-Զեյթուն վարչական շրջանների առաջին ատյանի դատարանի կողմից Կոմիտասի 5 հասցեում ծառահատումներ իրականացնելու վրա դրված արգելանքը, ինչպես նաև իրականացրել է ապօրինի հողազավթումներ՝ իրեն պատկանող պարսպապատ տարածքից դուրս՝ քանդելով պարիսպը: Ակնհայտ է, որ այս հաղորդումը բավարար է իրավապահ մարմինների կողմից ապօրինի շինարարությունը անհապաղ կասեցնելու համար: Սակայն դրա փոխարեն իրավապահները բռնությունների են ենթարկում այդ ապօրինությունների դեմ պայքարող շրջակա շենքերի բնակիչներին և նրանց սատարող քաղաքացիական և քաղաքական ուժերի ակտիվիստներին:
Մենք խստորեն դատապարտում ենք իշխանությունների հերթական հակաժողովրդական կեցվածքը և ոստիկանության անհամարժեք գործողությունները: Պահանջում ենք այսուհետ զերծ մնալ քաղաքացիների հանդեպ հակաօրինական գործողություններից, պատասխանատվության կանչել ոչ իրավաչափ ուժ կիրառող ոստիկաններին, ինչպեսև կասեցնել երևանցիների շահերը ոտնահարող և բացառապես մի քանի մեծահարուստի և ենթադրաբար՝ նաև պաշտոնյաների հարստացմանն ուղղված Կոմիտաս 5 հասցեում հակաօրինական շինարարությունը:
