«Առաջին լրատվական»-ի զրուցակիցն է միջազգայնագետ Աղասի Ենոքյանը։
– Պարոն Ենոքյան, վերջին օրերին Հայաստանում ԱՄՆ և ԵՄ դեսպանները Հայաստանում պարբերաբար անդրադառնւմ են կոռուպցիայի դեմ պայքարին, ընդգծում, որ բավարար ջանքեր չեն տարվում դրա համար։ Ուշադրության կենտրոնում են նաև Սարի թաղի իրադարձությունները։ Կարո՞ղ ենք ասել, որ գալիք ընտրություններին Արևմուտքը աչք չի փակի ընտրակեղծիքների վրա։
– Ես կարծում եմ՝ Արևմուտքը կփորձի ունենալ ընտրությունների հաղթաթուղթն իր ձեռքում։ Այսինքն՝ հնարավորինս քննադատաբար կլինեն, բայց ուզած թե չուզած՝ կընդունեն ընտրությունների արդյունքները։ Հնարավոր է նաև մեծ բացառություններով ընդունեն, և դա հետագայում իրենց ձեռքերում կդառնա լծակ իշխանությունների հետ խոսելու համար։
– Հնարավո՞ր է՝ ընտրությունների արդյունքների վավերացումը նաև արվի այն բանի համար, որ իշխանություններն այս անգամ չխուսափեն և ստորագրեն ՀՀ-ԵՄ շրջանակային համաձայնագիրը։
– Կարծում եմ՝ կստորագրեն ամեն դեպքում։ Չնյած դա կախված է նրանից, թե ինչքանով թույլ կտա Ռուսաստանը։ Հիմնական բովանդակությունը հանված է, և ամբողջ էությունը զուտ սիմվոլիկան է, այսինքն՝ Եվրոպայի և Ռուսաստանի հարաբերությունների սիմվոլիկ նշանակությունը։
– Ընդհանուր դաշտն ուսումնասիրելիս ի՞նչ եզրահանգման եք գալիս՝ կա՞ն այնպիսի ուժեր, որոնց Արևմուտքը կաջակցի այս ընտրություններին, որպես իշխանություններին այլընտրանքային գործընկեր կդիտարկի։
– Արևմուտքը գաղափարական առումով գործընկեր չի տեսնի։ Զուտ պրոարևմտյան ուժեր չկան. նույնիսկ «Ելք» դաշինքը, որը ենթադրվում էր, որ կլինի պրոարևմտյան՝ այդպես չեղավ։ Նիկոլ Փաշինյանն ասաց, որ իրենք արևմտյան ուժ չեն լինելու, այսինքն՝ «ո՛չ-ո՛չ»-ի տարբերակով են շարժվելու։ Սա նշանակում է, որ ընտրություն էլ չկա։ Ինչ-որ արդյունք կլինի, և ուզած չուզած՝ Արևմուտքը կհարաբերվի իշխանությունների հետ։
– Այսինքն՝ որևէ ուժի վրա խաղադրույք չի՞ արվի, նույնիսկ «Ազատ դեմոկրատների՞»։
– «Ազատ դեմոկրատները», չեմ կարծում, մյուս ուժերին լուրջ մրցակից կլինի։
– Կարո՞ղ ենք ասել, որ գալիք խորհրդարանը էապես չի տարբերվի այս խորհրդարանից՝ ռուսամետ նախագծերը վավերացնլու, ռուսական քարոզչություն տանելու իմաստով։
– Մի քիչ ավելի խորացած, մի քիչ ավելի Պուտինի էնտուզիաստների խորհրդարան։
Լուսանկարը՝ Photolure-ի
