ՄԱԿ-ի աշխատակիցները հաստատում են ստացել Սիրիայի մայրաքաղաք Դամասկոսի արվարձանում ռազմական գործողության զոհերի և հազարավոր վիրավորների մասին, որոնք օգնության կարիք ունեն: Ավելի վաղ հաղորդվել էր, որ հարձակման ժամանակ օգտագործվել է զարին թունավոր գազ, որի հետևանքով զոհվել է ավելի քան 1000 մարդ, հաղորդում է Interfax-ը:
«Տարածաշրջանում մեր աշխատակիցները կապ են հաստատել Սիրիայում լավ տեղեկացված աղբյուրների հետ: Այդ շրջանում կան հազարավոր վիրավորներ, որոնք բժշկական և հումանիտար օգնության կարիք ունեն»,- հայտարարել է Մարդու իրավունքների հարցերով ՄԱԿ-ի գերագույն հանձնակատար Նավի Փիլայը:
Նրա խոսքով, անկախ այն բանից՝ Սիրիայում կիրառվե՞լ է քիմիական զենք, թե՞ ոչ, հերթական անգամ սպանվել են շատ խաղաղ քաղաքացիներ:
Դեռևս պարզ չէ, թե ով է քիմիական զենք կիրառել: Սիրիայի ընդդիմությունը մեղադրում է կառավարական զորքերին:
