Չինատանի Մյանյան քաղաքի օդանավակայանը երեք ուղևորատար ինքնաթիռների չի թույլատրել վայրէջք կատարել օդանավակայանի տարածքում չճանաչված թռչող օբյեկտ հայտնվելու պատճառով։ Այս մասին հաղորդում է TASS գործակալությունը՝ վկայակոչելով տեղի ԶԼՄ-ները։
Օդանավակայանի աշխատակիցները լրագրողներին ասել են, որ դիսպետչերները օդանավերին ուղորդել են մոտակա օդանավակայաներ՝ անվտանգության կանոններից ելնելով։ Աշխատակիցները տեղի ունեցածի մասին տեղեկացրել են իրավապահներին, որոնց ներկայացուցիչներն օդանավակայանում տարօրինակ որևէ բան չեն հայտնաբերել։ Ականատեսների խոսքով՝ օդում հայտնված օբյեկտից լույս է ճառագել։
«Ներկայում օդանավակայանն աշխատում է սովորական ռեժիմով։ Օբյեկտը հայտնվել է օդում՝ գոտում, որը գտնվում է օդանավակայանի վերահսկողության տակ, բայց չի թռչել թռիչքուղու վրայով»,-նշել են օդանավակայանում։
