Արամ Հարությունյանը հրաման է ստորագրել. այսօրվանից թույլատրվում է սպանել կենդանիներին

ՀՀ բնապահպանության նախարար Արամ Հարությունյանը հրաման է ստորագրել ՀՀ տարածքում սիրողական որսի թույլտվության վերաբերյալ:

Ղեկավարվելով «Որսի և որսորդական տնտեսության վարման մասին» Հայաստանի Հանրապետության օրենքի 8-րդ հոդվածի 8-րդ կետով և հաշվի առնելով Հայաստանի Հանրապետության Գիտությունների ազգային ակադեմիայի Կենդանաբանության և հիդրոէկոլոգիայի գիտական կենտրոնի 2013 թվականի հուլիսի 31-ի N2459-126 գրությամբ ներկայացված առաջարկությունները ՀՀ բնապահպանության նախարար Արամ Հարությունյանը սույն թվականի օգոստոսի 22-ին ստորագրել է հրաման՝ Հայաստանի Հանրապետության տարածքում (բացառությամբ բնության հատուկ պահպանվող տարածքներից) սիրողական որսի թույլտվության վերաբերյալ:

Կից ներկայացվում է հրամանի պատճենը:

Հայաստանի Հանրապետության տարածքում որսի կենդանիների 2013-2014 թվականների սիրողական որսի համար թույլատրելի չափաքանակները եվ դրանց ժամկետները սահմանելու մասին

Ղեկավարվելով «Որսի եվ որսորդական տնտեսության վարման մասին» Հայաստանի Հանրապետության օրենքի 8-րդ հոդվածի 8-րդ կետով, ինչպես նաև հաշվի առնելով Հայաստանի Հանրապետության Գիտությունների ազգային ակադեմիայի Կենդանաբանության և հիդրոէկոլոգիայի գիտական կենտրոնի 2013 թվականի հուլիսի 31-ի N2459-126 գրությամբ ներկայացված առաջարկությունները

Հրամայում եմ`

1. Հայաստանի Հանրապետության տարածքում (բացառությամբ բնության հատուկ պահպանվող տարածքներից) թույլատրել հետևյալ որսատեսակների սիրողական որսը`

1) լոր – մինչև 60000 հատ, 2013 թվականի օգոստոսի 24-ից հոկտեմբերի 31-ը (10 հատից ոչ ավելի յուրաքանչյուր որսի ժամանակ),

2) աղավնիներ (թխակապույտ և անտառային, սովորական տատրակ) – մինչև 10000 հատ, 2013 թվականի օգոստոսի 24-ից 2014 թվականի հունվարի 31-ը (5 հատից ոչ ավելի յուրաքանչյուր որսի ժամանակ),

3) քարակաքավ – մինչև 3000 հատ, 2013 թվականի նոյեմբերի 1-ից դեկտեմբերի 31-ը (5 հատից ոչ ավելի յուրաքանչյուր որսի ժամանակ),

4) կտցարազգիներ (բացառությամբ Հայաստանի Հանրապետության կենդանիների Կարմիր գրքում գրանցվածների)- մինչև 2500 հատ, 2013 թվականի օգոստոսի 24-ից հոկտեմբերի 31-ը (5 հատից ոչ ավելի յուրաքանչյուր որսի ժամանակ),

5) արտույտներ (դաշտային, տափաստանային) – մինչև 2500 հատ, 2013 թվականի օգոստոսի 24-ից հոկտեմբերի 31-ը (5 հատից ոչ ավելի յուրաքանչյուր որսի ժամանակ),

6) սարյակ (սովորական) – մինչև 3000 հատ, 2013 թվականի օգոստոսի 24-ից հոկտեմբերի 31-ը (10 հատից ոչ ավելի յուրաքանչյուր որսի ժամանակ),

7) կեռնեխներ (սև կեռնեխ, սինակեռնեխ) – մինչև 2500 հատ, 2013 թվականի օգոստոսի 24-ից դեկտեմբերի 31-ը (10 հատից ոչ ավելի յուրաքանչյուր որսի ժամանակ),

8) ջրլող թռչուններ` բադեր (կռնչան բադ, կարմրագլուխ սուզաբադ, սուլող և ճքճքան մրտիմներ) և ջրհովվիկներ (փառփար, եղեգնահավ) – մինչև 10000 հատ 2013 թվականի սեպտեմբերի 15-ից 2014 թվականի փետրվարի 28-ը (2 հատ բադ և 2 հատ ջրհովվիկից ոչ ավելի յուրաքանչյուր որսի ժամանակ),

9) վայրի խոզ – մինչև 30 հատ, 2013 թվականի հոկտեմբերի 1-ից 2014 թվականի հունվարի 31-ը (1 հատից ոչ ավելի յուրաքանչյուր որսի ժամանակ),

10) Գորշուկ – մինչև 10 հատ 2013 թվականի սեմպտեմբերի 15-ից մինչև նոյեմբերի 15-ը (1 հատից ոչ ավելի յուրաքանչյուր որսի ժամանակ),

11) նապաստակ – մինչև 500 հատ, 2013 թվականի նոյեմբերի 1-ից 2014 թվականի հունվարի 31-ը (2 հատից ոչ ավելի յուրաքանչյուր որսի ժամանակ),

12) աղվես – մինչև 500 հատ, 2013 թվականի նոյեմբերի 1-ից 2014 թվականի հունվարի 31-ը (2 հատից ոչ ավելի յուրաքանչյուր որսի ժամանակ),

2. 2013-2014 թվականների որսաշրջանի ընթացքում վերոնշյալ կենդանատեսակների համար որսի թույլտվություն ունեցող անձանց չի արգելվում իրականացնել մոխրագույն ագռավի, կաչաղակի, գայլի և շնագայլի որս:

3. Հայաստանի Հանրապետության բնապահպանության նախարարության աշխատակազմի կենսառեսուրսների կառավարման գործակալության պետին`

1) կազմակերպել կենսառեսուրսների օգտագործման համար պայմանագրերի կնքումը ՀՀ կառավարության 2003 թվականի հուլիսի 7-ի «Կենդանական աշխարգի օբյեկտների` սոցիալական նպատակներով օգտագործման մասին պայմանագրերի կնքման կարգը հաստատելու մասին» N 884-Ն որոշման համաձայն.

2) որսաշրջանի ընթացքում ապահովել կնքված պայմանագրերի հիման վրա տրվող սիրողական որսի կտրոնների տրամադրման գործընթացը և հաշվառումն ըստ մարզերի:

4. Հայաստանի Հանրապետության բնապահպանության նախարարության աշխատակազմի բնապահպանական պետական տեսչության պետին` ապահովել վերահսկողությունը որսի իրականացման օրենսդրության պահանջների կատարման նկատմամբ:

5. Մամլո քարտուղարին` ապահովել սույն հրամանի լուսաբանումը զանգվածային լրատվության միջոցներով:

6. Սույն հրամանի կատարման հսկողությունը դնել Հայաստանի Հանրապետության բնապահպանության նախարարության աշխատակազմի ղեկավարի տեղակալի վրա: