Վրացական Apsny.ge կայքի փոխանցմամբ, Վրացական ընդդիմությունը «վա-բանկ» է գնում: «Ժողովրդական հավաքի» նախագահ Նոնա Գափրինդաշվիլին հայտարարել է, որ իշխանությունները չեն կարող վաղը Ռուսթավելի պողոտայում ռազմական շքերթ անցկացնել, որը նվիրված է լինելու Վրաստանի անկախության օրվան:
Գափրինդաշվիլին այս մասին հայտարարել է խորհրդարանի շենքի առջև, ուր ակցիայի կազմակերպիչներն ու մասնակիցները զբաղեցրել են այն տրիբունաները, որոնք նախատեսված են վաղվա շքերթի համար:
Գափրինդաշվիլին շնորհակալություն է հայտնել բոլոր նրանց, ովքեր, չնայած իշխանական տեռորին, եկել են խորհրդարանի շենքի մոտ, ուր վճռվում է Վրաստանի բախտը:
Բուրջանաձեն պետք է ցուցարարներին Հանրային հեռուստատեսության շենքից առաջնորդեր դեպի «Ազատության» հրապարակ, որտեղից մայիսի 21-ին մեկնարկել էին ընդդիմության ակցիաները, սակայն ճանապարհին փոշմանել է և ցուցարարներին հրահանգել է կանգ առնել խորհրդարանի շենքի մոտ: Փաստորեն, Բուրջանաձեն ցանկանում է ինքն ընդունել վաղվա ռազմական շքերթը:
Հիշեցնենք, որ երկու օր առաջ էլ Բուրջանաձեն հայտարարել էր, թե (2008 թվականի ռուս-վրացական պատերազմի ժամանակ) ռուսական ինքնաթիռներից Գորիում մազապուրծ եղած գերագույն հրամանատարը (Սաակաշվիլին) չպետք է ընդունի ռազմական շքերթը: