Երկուշաբթի Ֆրանսիայի մայրաքաղաքում սկսվել է Փարիզի ժամանակակից արվեստի թանգարանից մոտ 100 մլն եվրո արժողությամբ նկարների գողության գործով դատավարությունը: Այս մասին հայտնում է Agence France-Presse-ը:
Գողությունը տեղի է ունեցել 2010 թ. մայիսի լույս 20-ի գիշերը: Կողոպտիչները գողացել են Պիկասոյի «Աղավնին կանաչ ոլոռով», Մատիսի «Պաստորալ», Ժորժ Բրակի «Ձիթենի Էստակի մոտ», Ամեդեո Մոդիլյանիի «Հովհարով կանայք» և Ֆերնան Լեժեի «Մոմակալներով նատյուրմորտ» կտավները: Նկարները գնահատվում են ընդհանուր մոտ 100 մլն եվրո:
Գողության մեջ կասկածվում է 49-ամյա սերբ Վյերան Տոմիչը, որն արդեն խոստովանել է իր մեղքը: Սարդ-մարդ մականունով կրկնահանցագործը, որը 14 դատվածություն ունի, չի հայտնել հանցագործության պատվիրատուների անունները: Գողացված նկարները չեն հայտնաբերվել:
Տոմիչը ձերբակալվել է 2011 թ. մայիսին: Նրա հետ մեղադրյալի աթոռին են 2 ենթադրյալ հանցակիցներ, որոնք մեղադրվում են գողոնը գնելու համար:
Հետաքննության ընթացքում Տոմիչը պատմել է, որ ծրագրել էր գողանալ միայն Ֆերնան Լեժեի կտավը, սակայն հաջող դասավորված հանգամանքները նրան դրդել են մի նկարով չսահմանափակվել:
