Հունիսի 6-ից սկսվելու են «Կորել և գտնվել է Հայաստանում» ֆիլմի նկարահանումները Հայաստանում։ Ֆիլմի ռեժիսորն է «Մեծ պատմությունը փոքր քաղաքում» ֆիլմի հեղինակ Գոռ Կիրակոսյանը։
«Կորել և գտնվել է Հայաստանում» ֆիլմի սյուժեն հետևյալն է։ Ֆիլմի գլխավոր հերոսը՝ մի երիտասարդ ամերիկացի, որը ընկերների հետ հանգստանում է Թուրքիայում, կորչում է և ապա հայտնվում հայաստանյան մի գյուղում։ Հայաստանում ամերիկացի տուրիստին նախ թուրք են համարում, բայց հետո ընկերանում են նրա հետ։
«Ֆիլմի ասելիքն այն է, որ քո թշնամին կարող է դառնալ քո հերոսը»,- ասում է Գոռ Կիրակոսյանը։
«Ինձ համար Ցեղասպանության հարցը խիստ կարևոր է, սակայն այս ֆիլմը չի պատմում հայ-թուրքական հարաբերությունների մասին, այլ պատմում է հայերի մասին։ Այն, որ հայերը թուրքերին չեն սիրում, արդեն կարող է տարօրինակ թվալ հանդիսատեսին, և նա կարող է հետաքրքրվել ու իմանալ պատմությունը»,- ասում է ֆիլմի պրոդյուսեր Վալերի Մաքքեֆրին, որը Ցեղասպանությունը վերապրածների թոռ է։
Ֆիլմի ստեղծագործական խումբը նպատակ ունի այն ներկայացնել նաև միջազգային շուկայում, մասնակցել փառատոների և գտնել դիստրիբյուտորներ։ Եթե ֆիլմը կոմերցիոն հաջողություն ունենա, «Red Tie» կինոստուդիան այլ ֆլիմեր ևս կնկարահանի Հայաստանի մասին։
Թուրքիայի տեսարաններն արդեն նկարահանվել են ԱՄՆ-ում։ Գլխավոր դերում Անժելա Սարաֆյանն է, որը կինոդիտողին հայտնի է «Մթնշաղի Սագա» (Twilight) ֆիլմից։
Սցենարի համահեղինակներն են Քրիստ Մանարյանը, Նարեկ Ղափլանյանը և Գոռ Կիրակոսյանը։ Հայ հերոսների դերում հանդես են գալու Միքայել Պողոսյանը և Հրանտ Թոխատյանը։