Այսօր Երևանում կայացած Eurasia Mobile Challenge մրցույթի տարածաշրջանային եզրափակիչ փուլին մասնակցում էր ութ երկրից ժամանած 24 հաղթող թիմ։
Նշենք, որ Eurasia Mobile Challenge-ը «ՎիմպելԿոմ»-ի կորպորատիվ պատասխանատվության «Make Your Mark» առաջադիմական ծրագրի նախաձեռնություններից է։ Երևանյան միջոցառմանը 24 հաղթող թիմերը ներկայացնում են իրենց թվային գաղափարները՝ 11 հոգուց բաղկացած ժյուրիի անդամներին, որը կազմում են համաշխարհային առաջատար կազմակերպությունների միջազգային և տարածաշրջանային թվային ոլորտի ձեռներեցներ, գլոբալ ինվեստորներ և «ՎիմպելԿոմ»-ի բարձրաստիճան ղեկավարներ։ Ժյուրիի անդամները պետք է քննարկեն և ընտրեն երիտասարդ ձեռներեցների ներկայացրած բիզնես գաղափարներից ամենահեռանկարայինը։
«Այս տարվա եզրափակչի մասնակիցներին ընտրել ենք մոտ 1000 թիմերի շարքից։ Արդեն երկրորդ տարին է, որ անցկացվում է այս մրցույթը և կարող եմ ասել, որ հետաքրքրության աճ է նկատվում։ Նախորդ տարի ներկայացվել էր ավելի քան 600 հայտ։ Մրցույթը նախ անցկացվում է երկրներում, այնուհետև տարածաշրջաններում»,- լրագրողների հետ զրույցում ասաց «ՎիմպելԿոմ»-ի Եվրասիա միավորի գլխավոր գործադիր տնօրեն Միխայիլ Գերչուկը, և միևնույն ժամանակ հավելեց․
«Երիտասարդների մասնակցությունն այս մրցույթում կարևոր է երկու առումով՝ ցույց տալ իրենց գաղափարներն ու դրանց համար գնահատական ստանալ, ինչպես նաև սա հնարավորություն է հաջողակ ձեռներեցների, մասնագետների հետ շփվելու համար»։
Ներկայացված գաղափարները, ըստ Միխայիլ Գերչուկի, շատ տարբեր են՝ ուղղված բիզնեսին, ինչպես տունը դարձնել ավելի հարմարավետ, խաղարկային, էլեկտրոնային առևտուր, տեղեկատվական։ Վերջինիս տեղեկացմամբ՝ մրցույթում նախորդ տարի հաղթել է Ղրղըզստանի թիմը, որը ներկայացրել էր հենց էլեկտրոնային առևտրի գաղափարը, որը ներկայացնելով «ՎիմպելԿոմ»-ի Եվրասիա միավորի գլխավոր գործադիր տնօրենը նշեց․
«Առաջարկում էին ստեղծել marketplace, որտեղ տեղացի վարպետները կներկայացնեն իրենց արտադրանքն ողջ աշխարհին»։
Միխայիլ Գերչուկը նաև իր ուրախությունը հայտնեց մրցույթն այս տարի Հայաստանում անցկացնելու կապակցությամբ, որտեղից ևս մեծ թվով հայտեր էին ստացվել:
«Հայաստանում շատ են երիտասարդ ակտիվ ձեռներեցները, նաև ձեր երկիրը կապեր ունի աշխարհի շատ երկրների հետ: Գտնվելով Հայաստանում՝ հույս ունեմ, որ հողը կօգնի հայկական թիմերին լինել հաղթող խմբերի մեջ»,- ասաց նա։
«Մեծ պատիվ է, որ եզրափակչի համար հենց Հայաստանն է ընտրվել, քանի որ այն, ինչ մենք անում ենք, դուր է գալիս մարդկանց, ղեկավարությանը, այլ երկրներին: Ես հավատում եմ, որ հայկական խմբերը կհաղթեն այս փուլում և կգնան Բարսելոն»,- իր հերթին շեշտեց Հայաստանում «Beeline»-ի գլխավոր տնօրեն Անդրեյ Պյատախինը։
Նրա վստահեցմամբ՝ այս միջոցառման հիմնական նպատակն է օգնել երիտասարդներին կյանքի կոչելու իրենց լավ գաղափարները և ձեռք բերել փորձ լավ արտադրանք ստեղծելու համար։
«Ավելի քան համոզված ենք, որ ժամանակակից և ճկուն մտածելակերպով և թվային նորարարությունների ուղղությամբ կենտրոնացած այս երիտասարդները կարող են դառնալ այս ոլորտի հաջորդ խոշոր բջջային ֆենոմենը»,- նկատեց Անդրեյ Պյատախինը։
Վերջինս չբացառեց, որ հայկական թիմերի կողմից ներկայացված սթարթ-ափերից որևէ մեկը կարող է հետաքրքրել նաև իրենց ընկերությանը։
ՏՀՏ ոլորտում մասնագիտացած գործարար Դեբու Պուրկայասթայի գնահատմամբ՝ ներկայացված սթարթ-ափերի քանակը և որակը հիանալի էր։ Նա հույս հայտնեց, որ հաջորդ տարիների ընթացքում միլիոնավոր դոլարներով բյուջեով ստարտ-ափը կգա Հայաստան, քանի որ նրա կարծիքով՝ հայերն ունեն կրթական բարձր մակարդակ՝ թե՛ մաթեմատիկայի, թե՛ ֆիզիկայի բնագավառում, ինչը ըստ նրա՝ շատ կարևոր է։
Դեբու Պուրկայասթան, ով ի դեպ վարել է Google-ի միաձուլման և ձեռքբերումների ծրագիրը, սկսնակներին խորհուրդ տվեց մեծ ուշադրություն դարձնել իրենց թիմին, քրտնաջան աշխատել ու խելացի կերպով գումար հավաքագրել, որպեսզի այն իմաստալից կերպով օգտագործվի։
Նշենք նաև, որ տարածաշրջանային եզրափակչից հետո հաղթող երեք թիմերը Եվրասիան կներկայացնեն Բարսելոնում կայանալիք Բջջային կապի համաշխարհային կոնգրեսի Global Mobile Challenge եզրափակչում, որը տեղի կունենա փետրվարի 27-ից մինչև մարտի 2-ը: Այնտեղ են հավաքվելու տարածաշրջանային հաղթող թիմերն ամբողջ աշխարհից։
