Ազգային ժողովի նախագահ Հովիկ Աբրահամյանը վերանորոգումներ է սկսել իր հարկաբաժնում: Ասում են, որ նա որոշել է իր աշխատասենյակը շքեղ վերանորոգել: «Առաջին լրատվական»-ի հարցմանը, սակայն, ԱԺ լրատվական ծառայությունից պատասխանել էին, որ վերանորոգվում են խորհրդակցությունների համար նախատեսված երկու սենյակները:
Հիշեցնենք, որ այս ամառվա ընթացքում էլ ԱԺ նիստերի դահլիճում Համաշխարհային բանկի միջոցներով, Պետական հատվածի արդիականացման երկրորդ ծրագրի շրջանակներում, տեղադրվում էր օդափոխության համակարգը: Թեև նիստերի դահլիճը վերանորոգվել էր բոլորովին վերջերս՝ 2010 թվականին, բայց օդափոխության համակարգ չուներ, և հատկապես ամառային եղանակին այնտեղ շատ շոգ էր լինում:
Ինչ վերաբերում է նոր վերանորոգվող սենյակներին, ապա հայտնի չէ, թե այդ աշխատանքներն ինչ միջոցներով են կատարվում: ԱԺ-ն ի՞ր միջոցներով է իրականացնում, թե կրկին որևէ կառույց այն ֆինանսավորում է: Այնուամենայնիվ, այս օրերին այդ վերանորոգումների մասին Հանրապետական կուսակցության շրջանակներում խոսում են, որ ԱԺ նախագահ Հովիկ Աբրահամյանն իր համար խորհրդակցությունների կամ ընդունելությունների նախագահավայել սենյակներ է նորոգում և կահավորում:
ՀՀ նախագահի նստավայրում նման դեպքերի համար տարբեր սենյակներ կան: Եվ հատուկ արարողակարգ կա, թե նախագահը որ պատվիրակությանը որ սրահում պետք է ընդունի, կամ որ խորհրդակցությունը որ սենյակում է անցկացնում: Եվ ահա, ասում են, Հ.Աբրահամյանը որոշել է ԱԺ-ն վերածել յուրատեսական նախագահական նստավայրի:
