Գահընկեց արված «Մուսուլման եղբայրներ» շարժման առաջնորդ և Եգիպտոսի նախագահ Մուհամմեդ Մուրսիի աջակիցների ճամբարները ցրելու համար օգոստոսի 14-ից սկսված զինված բախումների հետևանքով զոհվածների ընդհանուր թիվը 900-ի է հասնում:
Վերջին օրերին բռնություններ են կիրառվել նաև Եգիպտոսի քրիստոնյաների նկատմամբ: Հարձակման են ենթարկվել մի քանի տասնյակ քրիստոնեական եկեղեցիներ, բնակելի տներ, դպրոցներ:
«Մեր եկեղեցու վրա հարձակում չի եղել: Պարզապես երբ զինվորականներին ոստիկանները ցրել են, մի քանի երիտասարդ փախուստի ժամանակ կրակե շիշը բակ են նետել, մեկ-երկու հոգի էլ քար են շպրտել։ Եկեղեցու վրա կազմակերպված հարձակում չի եղել»,- «Առաջին լրատվական»-ին տեղեկացրեց Եգիպտոսի հայոց թեմի առաջնորդ Աշոտ եպիսկոպոս Մնացականյանը:
Նրա տվյալներով՝ ցուցարարներին ցրելու ժամանակ է եղել, պարզապես առիթից օգտվել, նետել են: Հայոց եկեղեցին պահակազոր ունի, անմիջապես բենզինը հանգցրել են ու վերջ:
«Հատուկ մտահոգության հարց հիմա չունենք։ Բարեբախտաբար, ամեն ինչ հիմա խաղաղ է: Հուսանք՝ այս մեկ-երկու շաբաթվա մեջ հարցերը կլուծվեն»,- նշեց Աշոտ Սրբազանը:
Տեղեկացնենք, որ հարձակման ենթարկված եկեղեցիներն ու քրիստոնեական այլ հաստատությունները հարձակումների հետևանքով չեն ավերվել:
