Հովիկ Աբրահամյանը չի մասնակցել ՀՀԿ ԳՄ ընթացիկ տարվա առաջին նիստին: Աբրահամյանը ընդհանրապես պաշտոնաթողությունից հետո շատ քիչ է մասնակցում կուսակցական հավաքներին:
Մամուլում տարբեր տեղեկություններ են հրապարակվում այդ կապակցությամբ: Օրինակ՝ տեղեկություն կա, որ Հովիկ Աբրահամյանը չի կարողանում Սերժ Սարգսյանին համոզել, որ իրեն նշանակի նախընտրական շտաբի պետ: Մյուս կողմից՝ մի քանի օր առաջ տեղեկություն էր հրապարակվել, որ Հովիկ Աբրահամյանը հույսով սպասում է Գագիկ Ծառուկյանի վերադարձին՝ դրանում տեսնելով իր դիրքերի վերականգնման հնարավորություն: Այդ տրամաբանությամբ Աբրահամյանը Գագիկ Ծառուկյանի վերադարձից հետո պետք է մասնակցեր ՀՀԿ ԳՄ նիստին, այն էլ լավ տրամադրությամբ, դիրքերը վերականգնելու գործնական հեռանկարներով, ինչը, սակայն, տեղի չի ունեցել:
Մյուս կողմից՝ իսկ գուցե Հովիկ Աբրահամյանը իր դիրքերը այլևս ծրագրում է վերականգնել ոչ ՀՀԿ-ի շրջանակում, այլ դրանից դուրս, եթե անգամ ՀՀԿ-ի «մունդիրով»: Հրաժեշտ տալով վարչապետի պաշտոնին՝ Աբրահամյանը հայտարարեց, որ մնալու է ակտիվ քաղաքականության մեջ: Առայժմ նա այդ քաղաքականության մեջ չկա: Բացառված չէ, որ նրան այդպիսի խոստում տվել էր Սերժ Սարգսյանը, ինչն առայժմ չի իրականացնում: Թեև, դատելով Գագիկ Ծառուկյանի պրակտիկայից, հեռացված Հովիկ Աբրահամյանը դեռևս ժամանակ ունի վերադարձին սպասելու: Գագիկ Ծառուկյանը վերադառնում է հեռացվելուց գրեթե 2 տարի անց: Հովիկ Աբրահամյանին վարչապետի պաշտոնից և ըստ էության ակտիվ քաղաքականությունից հեռացնելուց անցել է ընդամենը չորս ամիս:
Իհարկե, դժվար է ասել, որ կա, այսպես կոչված, վերադարձի հստակ սահմանված, ունիվերսալ մի ժամկետ, որը կիրառական է բոլորի դեպքում: Համակարգում հեռացումն ու վերադարձը, ըստ ամենայնի, կախված են նրանից, թե հեռացվող սուբյեկտը որքանով է հայտնվում Սերժ Սարգսյանի լիակատար վերահսկողության կամ առավելագույն հուսալի ազդեցության ներքո:
Հովիկ Աբրահամյանը այդ տեսանկյունից ներիշխանական այն սուբյեկտն էր, որը կարող էր հանդիսանալ Սերժ Սարգսյանի առայժմ առաջին կարգավիճակի ամենալուրջ մրցակիցը: Այդ սուբյեկտին Սարգսյանը կարողացավ հեռացնել և ներկայումս երևի թե փորձելու է լուծել նրա հանդեպ լիակատար ազդեցություն ձեռք բերելու հարցը, որից հետո միայն կարող են որոշակի հեռանկարներ բացվել Հովիկ Աբրահամյանի՝ որևէ տարբերակով վերադարձ դիտարկելու, այդ հարցը իշխանական ծրագրերում օրակարգային դարձնելու համար:
Ներկայումս Հովիկ Աբրահամյանը պահեստային խաղացող է: Թեև ակնհայտ է նաև, որ «պահեստայինների նստարանին» կա ուժեղ մրցակցություն առավել երիտասարդ «խաղացողների» հետ, որոնք բավական ագրեսիվ սպասում են իրենց նորամուտին:
