Վրացական News Georgia կայքի փոխանցմամբ, այսօր Թբիլիսիում կայանալու է Վրաստանի և Եվրահանձնաժողովի առևտրային ու տնտեսական հարցերով համագործակցության ենթակոմիտեի 10-րդ նիստը: Այս մասին հայտարարել է Վրաստանի փոխարտգործնախարար Նինո Կալանդաձեն:
Փորձագետների մակարդակով այդ հանդիպումը կայանալու է Վրաստանի արտգործնախարարության շենքում: Քննարկվելու են Վրաստանի և ԵՄ-ի միջև ազատ առևտրի խորացմանն առնչվող խնդիրներ:
Այս կապակցությամբ Կալանդաձեն նշել է. «Տվյալ փուլում մեզ համար շատ կարևոր է ԵՄ-ի և Վրաստանի միջև ազատ առևտրի խորացմանն առնչվող համաձայնագիրը: Մենք հուսով ենք, որ շուտով պայմանավորվածություն ձեռք կբերվի տվյալ խնդրի շուրջ: Այդ պլանում Վրաստանը մեծ հաջողություններ է արձանագրել, ինչը կճանաչվի ԵՄ-ի պատվիրակության կողմից»:
Նշվում է, որ այդ համաձայնագրի կնքումը մտնում է «Արևելյան գործընկերություն» ծրագրի շրջանակներում ներառված նախաձեռնությունների մեջ:
Հիշեցնենք, որ ԵՄ արտաքին կապերի խորհրդի՝ Բրյուսելում կայացած նիստում Լիտվայի արտգործնախարար, ԵԱՀԿ գործող նախագահ Աուդրոնյուս Աժուբալիսը հայտարարել է, որ ժամանակն է, որպեսզի ԵՄ-ը «Արևելյան գործընկերություն» ծրագրի շրջանակներում Հարավային Կովկասի երկրների հետ բանակցություններ ձեռնարկի անցագրային ռեժիմի մեղմացման ու վերացման շուրջ:
