ՍՊԾ դիտացանցը հունվարի 12-ից մինչև 18-ը Հայաստանի Հանրապետության տարածքում 3 բալ և ավելի ուժգնությամբ երկրաշարժ չի գրանցել: Այս մասին տեղեկացրին «ՍՊԾ» գործակալությունից:
Տարածաշրջանում 3 բալ և ավելի ուժգնությամբ գրանցվել է 2 երկրաշարժ: Հունվարի 12-ին 3 բալ ուժգնությամբ (մագնիտուդ 2.5) երկրաշարժ է տեղի ունեցել Թուրքիայում՝ Դողուբայազեթ քաղաքից 22 կմ դեպի հյուսիս-արևելք: Հունվարի 14-ին 4-5 բալ ուժգնությամբ (մագնիտուդ 3.4) գրանցված ստորգետնյա ցնցման էպիկենտրոնը գտնվում էր Ռուսաստան-Ադրբեջան սահմանային գոտում՝ Միսկինջա (Դաղստան) գյուղից 22 կմ դեպի հարավ-արևմուտք:
Տարածաշրջանից դուրս 6.1 մագնիտուդով երկրաշարժ է գրանցվել հունվարի 14-ին Ֆիջիում՝ Նանդի քաղաքից 152 կմ դեպի հարավ-արևմուտք: Երկրաշարժի հետևանքով զոհեր և ավերածություններ չկան:
Հունվարի 18-ին 5.3-ից մինչև 5.7 մագնիտուդով 4 երկրաշարժ է տեղի ունեցել կենտրոնական Իտալիայում՝ 2016 թվականին գրանցված ուժեղ երկրաշարժերի էպիկենտրոնային գոտում՝ Լ’Աքվիլա (մարզ Աբրուցո) քաղաքից 25 կմ դեպի հյուսիս-արևմուտք: Երկրաշարժի հետևանքով զոհվել է Աբրուցո մարզի 83-ամյա մի բնակիչ, մեկն էլ համարվում է անհետ կորած: Կան ավերածություններ, որոնց վերացման աշխատանքները դժվարանում են ձնառատ եղանակային պայմանների պատճառով: Ամբողջությամբ ավերվել է Ամատրիչե (մարզ Լացիո) քաղաքի միջնադարյան զանգակատունը: Ստորգետնյա ցնցումներն զգացվել են Իտալիայի Աբրուցո, Լացիո, Մարկե մարզերի և մայրաքաղաք Հռոմի բնակչության կողմից: Անվտանգության նկատառումներից ելնելով Հռոմում դադարեցվել էր մետրոպոլիտենի աշխատանքը, փակվել են դպրոցներ և գրասենյակներ, այդ թվում՝ Ֆրոզինոնե (մարզ Լացիո) և Տեռնի (մարզ Ումբրիա) քաղաքներում:
