Արարատի և Վայոց Ձորի մարզերի ընդհանուր իրավասության դատարանի Եղեգնաձորի նստավայրում Ռոբերտ Պապոյանի նախագահությամբ սկսվել է Ռոլանդ Միրզոյանի գործի դատավարությունը:
34-ամյա Ռոլանդը 2013 թվականի մայիսի 30-ին, ժամը 15-ի սահմաններում իր «Մերսեդեսով» երթևեկել է հայրենի Ագարակաձորի կենտրոնական ճանապարհով:
Այդ նույն պահին նույն ճանապարհով դարձյալ «Մերսեդես» մակնիշի ավտոմեքենայով երթևեկելու համարձակություն է ունեցել Ռոլանդի հետ թշնամական հարաբերությունների մեջ գտնվող Դերենիկը:
Ավելին, Դերենիկի մեքենան ընթացել է Ռոլանդի մեքենայի առջևից և խանգարել է նրա լիարժեք երթևեկությանը:
Ըստ մեղադրանքի՝ Ռոլանդ Միրզոյանը Դերենիկին կանչել է գյուղից դուրս՝ պարզաբանումներ կատարելու:
Նրանք իրենց մեքենաներով գնացել են Երևան-Մեղրի ավտոճանապարհի Արփի գյուղի սկզբնական հատված, և արդեն 15-ն անց 30-ին պարզաբանումը վերածվել է վիճաբանության:
Առաջադրված մեղադրանքի համաձայն՝ Ռոլանդ Միրզոյանը ռետինե մահակով հարվածներ է հասցրել Դերենիկի գլխին, մարմնի տարբեր մասերին՝ պարանոցային երկրորդ ողի ատամնաձև կոտրվածքի, գլխուղեղի ցնցման, ճակատի ձախ մասի սալջարդ վերքի, աջ նախաբազկի, որովայնի առաջնային, կրծքավանդակի հետին պատերի արյունազեղումների ձևով պատճառել առողջության ծանր վնաս՝ կյանքին վտանգ սպառնացող:
Գյուղամեջով «Մերսեդեսային» «քաջարի» երթևեկությունը Ռոլանդի համար ավարտվել է ծանր հանցագործության համար մեղադրանքով՝ ՀՀ քրեական օրենսգրքի 112 հոդվածի 1-ին մասով:
Առաջիկայում Ռոլանդը «Մերսեդեսի» ղեկին չի նստի, որովհետև նրա խափանման միջոցը կալանավորումն է:
