Ընտրությունների անցկացման հարցերով դաշնային լիազոր Դիտեր Զարայթերը ցանցահենային հարձակումներ է ակնկալում բունդեսթագի՝ սեպտեմբերին կայանալիք ընտրությունների ընթացքում։ «Մենք պատրաստվում ենք կիբերհարձակումների բազմազան հարձակողական ռազմավարությունների, խաղարկում տարբեր սցենարներ»,-բնութագրել է նա նախապատրաստությունը Frankfurter Allgemeine Sonntagszeitung թերթի հետ հարցազրույցում։
Հաշվողական կենտրոնի հզորությունն արդեն եռապատկվել է։ Արտակարգ իրավիճակում հնարավոր կլինի օգտվել կիբերպաշտպանության կառավարական կենտրոնից։ Զարայթերի խոսքով՝ այսպիսով, խորհրդարանական ընտրությունները պաշտպանված են շահարկման ամեն տեսակի փորձերից։
Դրա հետ մեկտեղ նա նախազգուշացրել է կեղծ նորություների վտանգի մասին, որոնք կարող են կարևոր դեր խաղալ հենց անմիջապես քվեարկության օրը, օրինակ այն, որ որոշ կոնկրետ ընտրատեղամասեր փակ են։ Կեղծ նորությունների գործողությունը չեզոքացնելու համար ծրագրվում է կիրառել սոցցանցերը, օրինակ Twitter-ում գործի դնել հատուկ ալիք։
