ԱՄՆ-ում կինը մահացել է ինֆեկցիայից, որը կայուն է եղել բոլոր 26 տեսակի հակաբիոտիկների նկատմամբ, որոնք հասանելի են երկրի տարածքում։ Այս մասին գրում է AFP-ն՝ հղում անելով առողջապահության ոլորտի պաշտոնյաներին։
Կինը վարակվել էր Հնդկաստանում հանգստի ժամանակ։ Նևադա նահանգի բնակչուհին մահացել է 2016 թվականի սեպտեմբերին, 70 տարեկանում, սեպտիկ շոկից։ Դրանից կարճ ժամանակ առաջ նա եղել էր Հնդկաստանում, որտեղ ազդրի կոտրված էր ստացել և նախնական բուժում անցել։
Մասնագետները հյուսվածքներում հայտանբերել են հազվագյուտ Klebsiella pneumoniae բակտերիա, որը սովորաբար ծանր հիվանդություններ չի առաջացնում, սակայն տվյալ դեպքում դրա նոր շտամը դարձել է կնոջ մահվան պատճառ։
Մասնագետները նրա մահից հետո կատարված փորձաքննությունների արդյունքում եկել են եզրահանգման, որ հավանաբար ֆոսֆոմիցինը կօգներ նրան, սակայն այն լիցենզավորված չէ ԱՄՆ-ում։
Մասնագետները նշում են, որ Klebsiella pneumoniae բակտերիան գնալով ավելի կայուն է դառնում։ Իսկ ավելի վաղ գիտնականները հայտնել էին, որ 2050 թվականին սուպերբակտերիաները տարեկան կսպանեն մինչև 10 մլն մարդու, իսկ դրանցից վնասը կկազմի 100 տրիլիոն դոլար։
