Զինված տղամարդը մի քանի մարդու է պատանդել Բավարիայի դաշնային հողի Ինգոլշտադտ քաղաքի քաղաքապետարանի շենքում: Նա դեռևս ոչ մի պահանջ չի առաջադրել: Այս մասին հայտնում է RIA Novosti-ն՝ հղում անելով քաղաքային ոստիկանության ներկայացուցչին:
Արտակարգ իրավիճակի մասին ազդանշանը ոստիկանությունում ստացվել է տեղական ժամանակով մոտավորապես ժամը 9:00-ին (Երևանի ժամանակով ժամը 11.00-ին): Հայտնի չէ, թե քանի մարդու է պահում զինված տղամարդը:
N24 հեռուստաալիքի տվյալներով՝ հարձակումից հետո տարհանված շենքում ենթադրաբար շարունակում է մնալ քաղաքի երրորդ քաղաքագլուխ (բուրգոմիստր) Զեպ Միսլբեկը: Նա նույնպես կարող է լինել պատանդների շարքում:
Ոստիկանությունում այդ տեղեկությունը չեն հաստատել: Ոստիկանությունը հանցագործի հետ կապ է հաստատել, սակայն դեռևս պահանջներ չկան: Դեպքի վայրում են ոստիկանության հատուկջոկատայինները: Քաղաքապետարանի շենքը շղթայված է:
Տեղի ունեցածի պատճառով Գերմանիայի կանցլեր Անգելա Մերկելը չեղյալ է հայտարարել նախընտրական միջոցառումը, որը պետք է այսօր երեկոյան տեղի ունենար քաղաքում: Այս մասին հայտնել է Քրիստոնեա-դեմոկրատական միության ներկայացուցիչը:
