Ռուսաստանը տնտեսական պատերազմ է հայտարարել Ուկրաինային: Ըստ Ուկրաինայի գործատուների դաշնության՝ երկիրը փաստացի արգելել է ուկրաինական ապրանքների ամբողջ արտահանումը ռուսական շուկա: Ուկրաինացի արտահանողները հուլիսից սկսած ռուս-ուկրաինական մաքսային սահմանին ենթարկվում են խստագույն ստուգումների: Այս ամենին ի պատասխան՝ Ռուսաստանի Մաքսային միության մատակարարների ասոցիացիայի նախագահ Օլեգ Նոգինսկին նշել է, որ ոչ թե արգելվել է ուկրաինական արտահանումը ռուսական շուկա, այլ սկսել են պարզապես ավելի խիստ զննում իրականացնել:
Ավելի վաղ «Ռոսպոտրեբնադզորն» արգելել էր Ռուսաստան ներկրել ուկրաինական «Ռոշեն» ընկերության արտադրած հրուշակեղենը՝ պատճառաբանելով՝ թե դրանցում քաղցկեղածին բենզապիրեն նյութ կա:
Փորձագետների հաշվարկներով՝ այս քաղաքականության շարունակումը Ուկրաինայի կորուստները կարող է հասցնել 2-2,5 մլրդ դոլարի միայն այս տարվա երկրորդ կիսամյակում:
Այս քաղաքականության առումով պետք է ուշադրություն դարձնել այն հանգամանքին, որ աշնանը Վիլնյուսում կայանալիք «Արևելյան գործընկերության» գագաթնաժողովում Ուկրաինան պատրաստվում է Ասոցացման ու Խորը և համապարփակ ազատ առևտրի մասին համաձայնագիր ստորագրել Եվրամիության հետ:
Այդ նույն ճանապարհով պատրաստվում է անցնել նաև Հայաստանը: Եվ եթե հենց այս հանգամանքն է նման միջոցառումների իրականացման պատճառը, ապա Հայաստանի համար սա նույնպես նախազգուշացում է:
Ըստ Ազգային վիճակագրական ծառայության տվյալների՝ Ռուսաստանը Հայաստանի թիվ մեկ առևտրային գործընկերն է: Միայն այս տարվա առաջին վեց ամիսներին Ռուսաստան է արտահանվել մոտ 143 մլն 460 հազար դոլարի ապրանք:
Ռուսաստանին է բաժին ընկնում մեր արտահանման 20.5, ներմուծման՝ 23 տոկոսը, և այս թվերին մոտ տեսակարար կշիռ մեր արտաքին առևտրում չունի ոչ մի երկիր: Այնպես որ, առևտրային պատերազմը թանկ կարող է նստել հայ արտահանողների և ընդհանրապես Հայաստանի տնտեսության վրա: Ստացվում է, որ համաձայնագրի ստորագրումից առաջ Հայաստանը պետք է հասցնի գոնե որոշ չափով դիվերսիֆիկացնել արտահանումն ըստ երկրների՝ հնարավոր կորուստները նվազագույնի հասցնելու համար:
