Google կորպորացիան միշտ առանձնացել է աշխատանքի ճկուն պայմաններով՝ անվճար սնունդ, թեթև գրաֆիկ, գրասենյակային խաղեր: Կարելի է ավելացնել նաև հայտնի «20 տոկոսի կանոնը». իր աշխատաժամանակի հենց այդքան հատվածը կարող է աշխատողը ծախսել «կողմնակի» նախագծերի մշակման համար: Այժմ այդ կանոնը չեղյալ է հայտարարվել: Այս մասին հայտնում է Rosbalt-ը:
Հավանաբար, դա կապված է այն բանի հետ, որ ընկերությունը փոխում է կորպորատիվ ռազմավարությունը և կատարում ծառայությունների «մաքրություն»՝ թողնելով միայն հեռանկարայինները: Հենց այդ պատճառով էլ ավելի վաղ փակվել էր Google Reader-ը:
Այնպես որ այժմ ամերիկյան կորպորացիայի աշխատակիցները ավելի շատ ժամանակ կտրամադրեն իրենց հիմնական աշխատանքին:
Շնորհիվ աշխատանքի ընթացքում 20 տոկոս անձնական ժամանակի՝ Google-ի աշխատակիցները ստեղծել էին ոչ պակաս կարևոր ռեսուրսներ՝ AdSense գովազդային ծառայությունը, Gmail փոստը, Google News լրատվական ժապավենը և այլն: