Sputnik լրատվական գործակալության փոխանցմամբ՝ Իսրայելի նախագահ Ռեուվեն Ռիվլինը կնոջ հետ այսօր երկօրյա այցով ժամանել է Վրաստան։ Ընդգծվել է, որ Ռիվլինի վրացական այցը կասկածի տակ էր դրվել Երուսաղեմում դրանից առաջ գրանցված ահաբեկչության պատճառով, երբ բեռնատարը վրաերթի է ենթարկել մարդկանց։
Ամեն դեպքում Ռիվլինն այցելել է Վրաստան և հանդիպումներ է ունեցել այդ երկրի նախագահ Գեորգի Մարգվելաշվիլու և վարչապետ Գեորգի Կվիրիկաշվիլու հետ։
Թբիլիսիում կայացած համատեղ մամուլի ասուլիսի ժամանակ Մարգվելաշվիլին ու Ռիվլինը դատապարտել են Երուսաղեմի ահաբեկչությունը և պատրաստակամություն են հայտնել խորացնել երկու երկրների միջև հարաբերությունները։
Նրանց հանդիպումը մեկնարկել է տետ-ա-տետ ձևաչափով, ապա շարունակվել է ընդլայնված կազմով։ Կողմերը քննարկել են բիզնեսի, տնտեսության, մշակույթի և զբոսաշրջության ոլորտներում երկկողմ համագործակցության զարգացման պոտենցիալը։
Ռիվլինը հիշեցրել է, որ 2017 թվականին լրանում է երկու երկրների միջև դիվանագիտական հարաբերությունների հաստատման 25-ամյակը՝ հավելելով, որ ցանկանում է այցի ժամանակ ավելի շատ բան իմանալ Վրաստանի մասին։
