Տարեվերջին առաջիկա խորհրդարանական ընտրություններին դաշինքով մասնակցելու շուրջ ակտիվ քննարկումների մեջ էր Հայոց համազգային շարժում կուսակցությունը:
«Առաջին լրատվական»-ի հետ զրույցում ՀՀՇ կուսակցության գործադիր քարտուղար Կարեն Կարապետյանը ասաց, որ տոն օրերին այդ քննարկումները ընդհատվել են: «Դրանք ավելի շուտ կոնսուլտատիվ բնույթ ունեին, կարծում եմ՝ մոտ օրերս կվերականգնվեն»,- ասաց Կարապետյանը՝ չհստակեցնելով, թե կոնկետ որ ուժերի հետ էին տարվում այդ կոնսուլտացիաները:
«Կարծում եմ՝ կարող է ժամանակավրեպ լինել կոնկրետ ուժեր նշելը»,- ասաց Կարապետյանը:
Մեր տեղեկություններով՝ ՀՀՇ-ն, մասնավորապես, քննարկումներ էր տանում ԲՀԿ պատգամավոր Գուրգեն Արսենյանի գլխավորած ՄԱԿ կուսակցության հետ: «Ո՛չ կհաստատեմ, ո՛չ էլ կհերքեմ»,- մեր տեղեկությանն այսպես արձագանքեց Կարեն Կարապետյանը:
Հետաքրքրվեցինք նաև, թե ո՞ր ուժերի հետ իրենք երբեք համագործակցության չեն գնա, արդյոք կա՞ն չափանիշներ, որոնցով իրենք առաջնորդվում են. «Ես կգերադասեմ հարցին մոտենալ ոչ թե մերժման տեսանկյունից, այլ ավելի շուտ՝ հանունի. մենք պատրաստ ենք համագործակցել այն ուժերի հետ, որոնք Հայաստանի զարգացումն ու բարեկեցությունը համարում են առաջնային խնդիր ու արժեք, և բոլոր այն ուժերի հետ, որոնք կգնան այդ ճանապարհով»:
Դիտարկմանը, որ նույնիսկ Հանրապետական կուսակցությունն է ասում, որ իրենք այդ ճանապարհով են գնում, Կարեն Կարապետյանն արձագանքեց. «Համաձայն եմ, բոլորը այդպես են նշում: Բայց կարծում եմ՝ ցանկացած քաղաքական ուժի գործունեության արդյունքում ի հայտ է գալիս նրա ծրագրային դրույթների ու գործունեության տարբերությունը: Չեմ կարծում, որ քաղաքական ուժը կկարողանա իր իրական գործունեությունը թաքցնել: 21-րդ դարում ամեն ինչ շատ ավելի թափանցիկ է, քան մեզ թվում է»,- եզրափակեց մեր զրուցակիցը:
