Երեկ Սուրբ Խաչի վրա 1713-րդ խաչի տեղադրման արարողությանը ներկա էր նաև արտակարգ իրավիճակների նախարար Արմեն Երիցյանը: «Առաջին լրատվական»-ի հետ զրույցում նա նշեց, որ այստեղ են, որ «կանգնեն մեր ժողովրդի կողքին, որ ժողովուրդը տեսնի՝ իրենց հետ են»:
Արմեն Երիցյանն անդրադարձավ նաև վերջին օրերին եկեղեցու շուրջ ծավալվող իրադարձություններին: «Այս ամբողջը խոսակցություններ են, և մենք՝ որպես քրիստոնյաներ, պետք է ցույց տանք և մեկ անգամ ևս ապացուցենք, որ քրիստոնյա ենք, և պետք է կարողանանք մեր ավանդույթները պահպանել»,- ասաց նա՝ հավելելով, որ պետք է միասին գնանք առաջ, որ «պինդ ու ամուր լինենք, և մեր հարևաններն էլ տեսնեն, որ ամուր ենք»: Նա նշեց, որ եկեղեցին պետք է ավելի ուժեղանա:
Խոսելով վերջին օրերին մամուլում շրջանառվող՝ կաթողիկոսի հրաժարականի պահանջի մասին, նա նշեց, որ կաթողիկոսն իր տեղում է, իր աշխատանքը կատարում է։ «Հիմա ինձ էլ՝ որպես արտակարգ իրավիճակների նախարարի, կարող են ասել, որ այս մի բանը լավ ստացվեց, մեկը խեղդվեց, մեկը զոհվեց, պետք է հրաժարական տալ: Բայց այդպես չէ, մենք պետք է առաջ գնանք միասին, դուք էլ մեր կողքին պետք է կանգնած լինեք»,- ասաց նա:
Հարցին՝ ինչո՞ւ ՕԵԿ-ին շատերը չեն սիրում, իսկ նախարարին սիրում են, նա պատասխանեց, որ ընդհանուր առմամբ «կուսակցությունն իր առջև դրած խնդիրները կատարում է, որպես կուսակցություն կայացած է»:
Ա. Երիցյանը նշեց, որ 911 ծառայությունը երբեմն նաև այնպիսի զանգեր է ստանում… Օրինակ՝ զանգահարում են և խնդրում երեխայի մաթեմատիկայի խնդիրը լուծել։ «Շատ ժամանակ աբսուրդի է հասնում վստահությունը, բայց կարծում եմ, որ մենք ժողովրդի կողքին ենք»,- եզրափակեց նախարարը:
