Այսօր մեծ հանդիսությամբ Սուրբ Խաչի վրա տեղադրվեց 1713-րդ խաչը՝ հաջորդաբար խորհրդանշելով Քրիստոնյա Հայաստանի տարիքը: «Նիգ-Ապարան» հայրենակցական միության պատվավոր նախագահ, ՀՀ գլխավոր դատախազ Աղվան Հովսեփյանը, ով հեղինակել է Սուրբ Խաչ և Սուրբ Երրորդություն Հույսի խորան հաղորդարանը, լրագրողների հետ զրույցում նշեց, որ յուրաքանչյուր տարի Խաչի օծության օրն արժևորվելու է մեր Քրիստոնյա Հայաստանի տարիքը:
Նա վստահ է, որ այս սովորույթը, որի մեջ միաձուլված են և՛ հոգևոր, և՛ աշխարհիկ իմաստները, տարիներով կշարունակվի և կդառնա մեր ժողովրդի համար մի սքանչելի ուխտատեղի։ «Համենայնդեպս, մենք դրա համար ամեն ինչ կանենք»,- վստահեցրեց Աղվան Հովսեփյանը:
Նա նշեց, որ իր կյանքն իմաստավորված է նրանով, որ ամեն անգամ կարող է համբուրել իր 87 տարեկան հոր ձեռքը:
«Առաջին լրատվական»-ի հարցին՝ արդյո՞ք կարողանում ենք ապրել քրիստոնեական արժեքներով, և որքանո՞վ է Աղվան Հովսեփյանը հավատարիմ մնում այդ արժեքներին, մեր զրուցակիցը պատասխանեց. «Ես կզարմանայի նրանց վրա, ովքեր չեն կարողանում ապրել դրանով: Զարմանալ, թե ինչպես է մարդը դրանով ապրում, անհրաժեշտություն չկա, որովհետև այդ ամենը տրված է մարդուն էության, հոգու, հոգեբանության, բջիջների մեջ: Եվ ճիշտ հակառակը՝ ամեն անգամ պետք է զարմանալ, երբ այդ արժեքները չեն պահպանվում»։