Նախօրեին կառավարությունում հյուրընկալվել էր Չիլիի մասնավոր կենսաթոշակային համակարգի հիմնադիր Խոսե Պինիերան, ով Հայաստան է ժամանել ՀՀ վարչապետ Տիգրան Սարգսյանի հրավերով՝ «կիսվելու կենսաթոշակային բարեփոխումների վերաբերյալ Չիլիի փորձով»։ «Առաջին լրատվականի» հետ զրույցում ԱԺ տնտեսական հարցերի մշտական հանձնաժողովի փոխնախագահ Վարդան Բոստանջյանը, սակայն, չի կարծում, թե Չիլլի փորձը չի կարող է Հայաստանի համար հիմք հանդիսանալ։ «Չիլլի փորձը չի կարող Հայաստանի համար հիմք լինել, քանի որ ՀՀ-ում եկամուտները չափազանց ցածր են, եկամուտներից որոշակի առանձնացում իրականացնելը, ըստ էության, ավելի է վատթարացնում քաղաքացու վիճակը»,- «Առաջին լրատվականի» հետ զրույցում ասաց տնտեսագետը։ Հիշեցնենք, որ 2014թ. Հայաստանում ներդրվելու կենսաթոշակային պարտադիր կուտակային համակարգ, ըստ որի աշխատողները իրենց աշխատելու տարիների ընթացքում են կուտակելու իրենց կենսաթոշակը, որն հավաքվելու է հատուկ ֆոնդերում և կառավարվելու է մասնավոր կառավարիչների կողմից։
«Պետք է ելնել այն հանգամանքից, որ այդ կենսաթոշակային կուտակային միջոցները, որոնք կոպիտ հաշվարկներով կազմում են տարեկան 100 մլն դոլար, մեր երկրի նման ոչ մեծ երկրի համար չափազանց մեծ թիվ են կազմում, և պետք է հստակ լինի, թե ամեն տարի ո՛ր նպատակային ծրագրերին են ուղղվելու այդ գումարները, որոնք հնարավոր լինի հետգնում կատարել, որպեսզի մենք հասկանանք, որ տարբերություն չկա, կենսաթոշակային տարիքի հասնելու դեպքում մենք կունենանք միջոցներ, որոնք կարելի կլինի վերաբաշխել այդ նույն մարդկանց, ովքեր մասնակցել էին»,- ասաց Վ. Բոստանջյանը` հավելելով, որ «ցավոք, այդ 100 մլն դոլարը, ամենայն հավանականությամբ, չի մնալու ՀՀ-ում»: «Ըստ օրենքի, դա պետք է հանձնվի ավելի էֆեկտիվ կառավարիչների, որոնք, որպես կանոն, գտնվում են դրսում»,- շեշտեց տնտեսագետը: