Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը ՄՃԽ-ի երեկ հրապարակած Նախիջևանի մասին զեկույցը համարում է Եվրամիության՝ մեր տարածաշրջանի հանդեպ հետաքրքրության ավելացման հերթական ապացույցը։
«Միջազգային ճգնաժամային խմբի զեկույցի մեջ որևէ աշխարհաքաղաքական երանգներ չեմ տեսնում։ Վերջին ժամանակներս Եվրամիությունը շատ է անդրադառնում Հարավային Կովկասի ժողովուրդների իրավունքների պահպանման խնդիրներին՝ անկախ իրենց ունեցած ստատուսից։ Նույնիսկ մտադրություն կա հարաբերություններ սկսել Լեռնային Ղարաբաղի բնակչության հետ։ Այս զեկույցը ևս վկայում է այդ միտումի մասին»,-կարծիք է հայտնում փորձագետը։
Հիշեցնենք, որ ՄՃԽ-ն, երեկ անդրադառնալով Ջավախքի հայության հիմնախնդիրներին, կոչ է արել Վրաստանի կառավարությանը հայերի ինտեգրման, լեզվին ու մարդու իրավունքներին առնչվող խնդիրները լուծելու համար ապահովել բոլոր հնարավորությունները։
Ըստ Մանվել Սարգսյանի՝ միջազգային կազմակերպությունն այս հորդորով ընդամենը փորձում է կանխել հայ-վրացական էթնիկ բախումները։ «Վրաստանին ընդամենը առաջարկում են ուշադիր լինել Ջավախքի հանդեպ, որպեսզի հետագայում բացառվեն ջավախահայության կողմից հնարավոր անկախության պահանջները»,- կարծում է Մանվել Սարգսյանը։
