Հաշվի առնելով ԱՎԾ-ի կողմից հրապարակված 2011 թ. առաջին եռամսյակի տնտեսական ակտիվության ցուցանիշը (ՏԱՑ)՝ ՀՆԱ-ի աճի տեմպը մարտի վերջին ԿԲ-ն գնահատել է 2.7%։ Այս մասին ասվում է ԿԲ հասարակայնության հետ կապերի հրապարակած տվյալներում։ Նշենք, որ ԱՎԾ-ն Հայաստանի առաջին եռամսյակի ՀՆԱ աճի վերաբերյալ տվյալներ հրապարակելու է հունիսի կեսերին։
Արդյունաբերության, շինարարության և ծառայությունների ճյուղերում ավելացված արժեքների աճերը ԿԲ-ն այս տարվա առաջին եռամսյակի համար գնահատել է համապատասխանաբար 5.9%, 5.5% և 2.9%: «Գյուղատնտեության ճյուղում գնահատվում է ավելացված արժեքի 1.0%-ով նվազում, որը պայմանավորված է, անասնապահության և բուսաբուծության ենթաճյուղերում թողարկման ծավալների անփոփոխ մակարդակի պայմաններում, ձվի արտադրության ծավալների անկմամբ: Այդուհանդերձ, պահպանվում են մինչև տարեվերջ ճյուղում թողարկման ծավալների աճի ակնկալիքները»,- կարծում է ԿԲ-ն:
Նշենք, որ ՏԱՑ-ը, ի տարբերություն ՀՆԱ ցուցանիշի, հաշվարկվում է տնտեսական գործունեության տեսակների թողարկման ծավալների, ոչ թե ավելացված արժեքների ծավալների հիման վրա և չի ներառում արտադրանքի զուտ հարկերն ու ֆինանսական միջնորդության անուղղակիորեն չափվող ծառայությունները: Նշենք նաև, որ այս տարվա բյուջեով նախատեսված է ՀՆԱ աճի 4.6% ցուցանիշ։