ՀՀ գլխավոր դատախազության մոտ կայացած մեկժամյա ակցիան, որը նվիրված էր քաղբանտարկյալների ազատ արձակմանը, աչքի էր ընկնում մարդաշատությամբ: Հիշեցնենք, որ 2008 թվականի ապրիլից սկսած՝ ամեն ուրբաթ օր Հայ ազգային կոնգրեսի ակտիվիստները կազմակերպում են ակցիա` ի պաշտպանություն քաղբանտարկյալների: «Ազատ, անկախ Հայաստան», «Պայքար, պայքար մինչև վերջ», «Ազատություն քաղբանտարկյալներին», «Աղվան, ձեռքերդ հեռու Նիկոլից» , «Սերժիկ, մարդասպան», «Նիկոլ, Նիկոլ»՝ վանկարկում էին ընդդիմության ներկայացուցիչները տևական ժամանակ: Նրանք, ինչպես միշտ, ներկայացել էին քաղբանտարկյալների նկարներով: ՀԱԿ ակտիվիստներին վրդովեցրել էր հատկապես «Հայկական ժամանակ» օրաթերթի գլխավոր խմբագիր Նիկոլ Փաշինյանի նկատմամբ երկու օր առաջ «Կոշ» քրեակատարողական հիմնարկում կիրառված բռնությունը: ՀՀ գլխավոր դատախազության շենքը շրջապատած ոստիկանները փորձեցին հեռացնել ՀԱԿ ակտիվիստ Վարդգես Գասպարիին, որը «Դադարեցրեք բռնություններն ու խոշտանգումները բանակում, ոստիկանությունում, կալանավայրերում, մասնավորապես՝ քաղբանտարկյալների նկատմամբ» գրությամբ ցուցապաստառը վեր պարզած՝ անցնում էր ոստիկանների միջով: ՀԱԿ ակտիվիստները շրջապատեցին ոստիկաններին` փորձելով կանխել Վարդգես Գասպարիին հեռացնելու փորձերը: ՀԱԿ համակարգող Լևոն Զուրաբյանը ցուցարարներին կոչ արեց ցուցաբերել հանդարտություն: Որևէ միջադեպ չարձանագրվեց: Ընդդիմության ակտիվիստները, ինչպես ամեն ուրբաթ, այս անգամ էլ դիմում հանձնեցին ՀՀ գլխավոր դատախազություն և ժամը 15. 00-ին հեռացան:
