«Հրապարակ» օրաթերթի գլխավոր խմբագիր Արմինե Օհանյանն այսօրվա համարում գրում է.
«Մեզանում կան շատ կառույցներ, որոնց գործառույթները հստակեցված չեն, կրկնում են այլ կառույցներին ու մարմիններին: Ընդհանրապես կառավարման օպտիմալացման խնդիրն ամենակարևոր հարցերից է: Մանավանդ փոքր բյուջե ունեցող մեր երկրի համար, որտեղ ամեն դրամը պետք է հաշվված լինի, ու դրա ծախսը՝ արդարացված: Ասենք, ինչի՞ համար են ահռելի փողեր խժռող նախարարություններն ու տարբեր գերատեսչությունները, որոնց հալալ կեսը կարելի է գրչի մի հարվածով կրճատել, և մեր կյանքից ոչինչ չի պակասի: Ի՞նչ իմաստ ունի պահել հսկայական բյուրոկրատական ապարատ, որն իր անելիքը չգիտի և ավելի շատ խանգարում է գործ անող մարդուն, քան օգնում: Ինչ կուզեք ասեք, բայց ես, օրինակ, բացարձակապես չեմ հասկանում սփյուռքի նախարարության իմաստը: Կասեք՝ ամենաակտիվ նախարարությո՞ւնն է՝ իր գերակտիվ նախարարուհիով: Դե, ամենաշատն է երևում էկրանին, ամենաշատն է խոսում ու ամենաշատ միջոցառումներն է կազմակերպում:
Բայց եթե ուշադիր լինեք այդ միջոցառումների բովանդակությանը, դրանց գերակշռող մասը կրթության եւ գիտության նախարարության գործառույթներից է, մյուսը՝ քաղաքապետարանների ու մարզպետարանների, մի հսկա հատված էլ` մշակույթի նախարարության:
Խմբագրականն ամբողջությամբ՝ կարդացեք «Հրապարակ»-ի այսօրվա համարում:
