ԲՀԿ խմբակցության ղեկավար Նաիրա Զոհրաբյանն իր ելույթում նշեց, որ չի հավատում, որ «Քրեական օրենսգրքում» փոփոխություններ կատարելու մասին նախագիծը, որը վերաբերում է ապօրինի հարստացմանը, լիարժեքորեն գործելու է:
«Մինչև այս օրենքն էլ այսլ օրենքներով արգելվում է կաշառք վերցնելը, պաշտոնական դիրքքի չարաշահումը… Դալանում դատավորին բռնում են այն ժամանակ, երբ անհրաժեշտություն կա հեռուստատեսությամբ կոռուպցիայի դեմ պայքարելու շոու սարքելու: Իսկ առավել մեծ կոռուպցիոները հանգիստ նստած է ոչ թե դալաններում, այլ իրենց աշխատասենյակներում»,- ասաց Նաիրա Զոհրաբյանը:
Նա նշեց, որ իրենք նախագծին կողմ են քվեարկելու, քանի որ բացարձակ անհասկանալի կլինի, որ ապօրինի հարստացման դեմ նախագծին որևէ մեկը դեմ լինի: «Բայց մտածել, որ նախագիծն ընդունելուց հետո բոլոր խնդիրները լուծվելու են, ազնիվ չէ: Երբ ինչ- որ մեկը նշանակվում է պաշտոնի, ասում է՝ դե լավ, գնամ մի քիչ էլ ես լավ ապրեմ, այդտեղից պետք է սկսել, պետք է բռնել այդ մարդու ձեռքը, նույնիսկ փոքր պաշտոն չպետք է վստահել»:
Նաիրա Զոհրաբյանի խոսքերով՝ լրատվամիջոցներից մեկը հետազոտություն էր արել, թե որտեղ են հանգստանում ՊԵԿ-ի պաշտոնյաները, անգամ միջին պաշտոնյաները: «Պարզվեց, որ արաբական շեյխերը գլուխները պատին են տվել: Ում հետ խոսում ես, ասում են՝ հարստացել ենք հալալ քրտինքով, հիմա քրտինքի էքսպերտիզայի դրույթ ավելացնե՞նք»,- նշեց Զոհրաբյանը՝ հավելելով, որ խնդիրներ կան, որ անգամ օրենքից են վեր, կան չգրված օրենքներ, որոնք շատ դեպքերում ավելի զորեղ են, քան ՀՀ Սահմանադրությունը:
Մանրամասները՝ տեսանյութում:
