ՌԴ նախագահ Վլադիմիր Պուտինի Ադրբեջան կատարած այցը չպետք է դրամատիկացնել, թեև ՌԴ-ից անակնկալներ միշտ է պետք սպասել: Լուծումն այն է, որ ՀՀ-ն ու Վրաստանը պետք է դուրս գան ՌԴ-ի ձևավորած փակուղուց և թույլ չտան Կրեմլին Հարավային Կովկասում իր խաղը տանել:
Այս մասին «Առաջին լրատվական»-ի հետ զրույցում ասաց Վրաստանի աշխարհաքաղաքական հետազոտությունների միջազգային կենտրոնի նախագահ, վրացի ռազմական փորձագետ Թենգիզ Փխալաձեն` անդրադառնալով ՌԴ նախագահ Վլադիմիր Պուտինի Ադրբեջան կատարած պաշտոնական այցին:
Նա նշեց, որ թերևս պետք է սպասել Պուտին-Ալիև հանդիպման արդյունքներին, որովհետև ամենաճիշտն այդ հանդիպման արդյունքները վերլուծելն ու մեկնաբանելը կլինի: Բայց վրացի քաղաքագետը չի կարծում, թե Հայաստանում և Վրաստանում պետք է դրամատիկացնել Պուտինի այցն Ադրբեջան, քանի որ ոչ մի զարմանալի բան չկա, որ Պուտինն Ադրբեջանում է ներկայացուցչական պատվիրակությամբ:
«Դա Վլադիմիր Պուտինի առաջին այցն է նրա՝ ՌԴ նախագահ վերընտրվելուց հետո, և այդ այցը նախապատրաստվում էր վաղուց, ու ՌԴ ղեկավարությունը բավականին երկար ժամանակ դա սպեկուլյացիայի առարկա էր դարձրել:
Այն, որ Ռուսաստանն ունի հետաքրքրություններ Ադրբեջանում, դա հասկանալի է. ես չեմ կարծում, որ Ադրբեջանն այսօր կնքում է գործարք ինչ-որ կողմի դեմ: Ի՞նչ պետք է անեն Հայաստանն ու Վրաստանը. պետք է ուղիներ գտնեն, որ ապահովեն համագործակցություն Հարավային Կովկասում ոչ միայն երկկողմ, այլև բազմակողմ ձևաչափով: Ես նկատի ունեմ նաև այն, որ պետք է համագործակցության ոլորտներ գտնել Հայաստանի ու Ադրբեջանի միջև: Այս տարածաշրջանում անվտանգությունը կախված է Վրաստանից, Հայաստանից, Ադրբեջանից, և պետք է լուծումներ գտնել առանց Հյուսիսային հարևանի օգնության: Եթե կարողանանք այդ ուղիով գնալ, կլինենք հաջողակ, եթե ոչ, ապա ներկայիս իրավիճակը կշարունակի գործել միմիայն ՌԴ-ի օգտին:
Այսօր ՌԴ-ն օգտագործում է հայ-ադրբեջանական հակամարտությունը, աշխատում է, որ ո՛չ Հայաստանը լինի ուժեղ պետություն, ոչ էլ Ադրբեջանը: Ինչ վերաբերում է ռուս-վրացական հարաբերություններին, ապա գիտեք, որ Վրաստանի տարածքի 20 տոկոսն օկուպացված է ռուսական զորքերի կողմից: Ռուսական իմպերիայի սկզբունքն է իշխանությունը բաժան-բաժան անելը: Ես կարծում եմ, որ Հայաստանն ու Վրաստանը պետք ուղիներ փնտրեն ՌԴ-ի ստեղծած փակուղուց դուրս գալու համար և թույլ չտալ Կրեմլին իր խաղը խաղալ: Մոսկվայից միշտ պետք է անակնկալներ սպասել»,- մեկնաբանեց Թենգիզ Փխալաձեն:
Նրա կարծիքով՝ ՌԴ-ն ճնշման բազում լծակներ ունի Հայաստանի նկատմամբ, որոնցից մեկը տնտեսականն է, և Մոսկվան ամեն կերպ ջանում է, որ Հայաստանը և Հարավային Կովկասի երկրներն ընդգրկվեն ՄՄ և Եվրասիական միություն ու ցանկացած այլ միություն, որտեղ ՌԴ-ն դոմինանտ դիրքեր ունի:
Ըստ նրա՝ բնական է, որ ջանալու է բոլոր լծակներն օգտագործել Հայաստանի նկատմամբ և ավելի ակտիվ, քանի որ Հայաստանն է իր ռազմավարական գործընկերը: Քաղաքագետի համոզմամբ, սակայն, այստեղ Կրեմլի քաղաքականությունը չի փոխվել, ուստի Հայաստանն ու Վրաստանն ունեն բավարար խելք ու փորձ, որպեսզի ռուսական հերթական պրովոկացիաներին չտրվեն:
«Մենք պետք է ուղղորդվենք ոչ թե Կրեմլի հետաքրքրություններով, այլ նրանով, թե մեզ ինչն է ձեռնտու: ԵՄ-ի հետ Ասոցացման համաձայնագրի ստորագրումը Վրաստանի և Հայաստանի համար շատ կարևոր է, որից էլ կախված է մեր երկրների հետագա ճակատագիրն ու զարգացման հեռանկարը: Ուստի պետք է ձգտել այս ուղղությամբ: Պետք է գտնել ուղիներ՝ Հարավային Կովկասի խնդիրները սեփական ուժերով լուծելու համար և՝ առանց մեծ եղբոր միջամտության:
Ցանկացած երկրի ճնշումները թուլացնելու ամենալավ մեթոդը արևմտյան ստանդարտների ներդրումն ու իրականացումն է, ուստի ԵՄ ուղղությամբ շարժվելը հենց այս հարցի լուծումն է»,- ասաց Թենգիզ Փխալաձեն:
Հիշեցնենք, որ այսօր Ռուսաստանի նախագահ Վլադիմիր Պուտինի ղեկավարած խոշոր պատվիրակությունը՝ բաղկացած վեց նախարարներից և տասնյակ տարբեր տրամաչափի այլ պաշտոնյաներից, ժամանել է Բաքու՝ մի շարք ոլորտներում Ադրբեջանի հետ պայմանավորվածություններ ձեռք բերելու նպատակով:
