«Ջերմուկ ազգային պարկի» ստեղծման նպատակով ՀՀ բնապահպանության նախարարությունն ու «Լիդիան Արմենիա» ընկերությունը ստորագրեցին փոխըմբռնման հուշագիր:
«Ջերմուկ ազգային պարկի» ծրագրում «Լիդիան Արմենիան» առաջիկա 5 տարիների ընթացքում ներդնելու է ավելի քան 5 մլն ԱՄՆ դոլար: «Ջերմուկ ազգային պարկի» կայուն զարգացման ապահովման նպատակով ծրագիրը միտված է կենսաբազմազանության պահպանմանը, էկոտուրիզմի եւ էկոգյուղատնտեսության ծրագրերի ներդրմանը:
«Լիդիան Արմենիա» ընկերության գործադիր տնօրեն Հայկ Ալոյանի խոսքով՝ հուշագիրը հանքարդյունաբերության ոլորտում բնապահպանական արդյունավետ կառավարման նոր մշակույթ կստեղծի:
«Ջերմուկ ազգային պարկի» հիմնումը հանքարդյունաբերության և ՀՀ բնապահպանության նախարարության համատեղ աշխատանքի և ընդհանուր ծրագրերի իրագործման կարևոր քայլ է: «Լիդիան Արմենիա» ընկերությունն այս ծրագրում ներգրավելու է ոչ միայն տեղական, այլ նաև միջազգային փորձագետների, մասնագետների, համաշխարհային հռչակ ունեցող մասնագիտական խմբեր: Մեր ընկերության նպատակն է` համագործակցելով ՀՀ բնապահպանության նախարարության հետ, ստեղծել էկոտուրիզմի, էկոգյուղատնտեսության և կենսաբազմազանության պահպանության օրինակելի ծրագիր, որից կօգտվե ն բնությունը և մարդիկ»,- ասաց նա` հավելելով, որ փաստաթղթի ստորագրումը կարևոր է նաև ապացուցելու համար, որ հանքարդյունաբերությունը կարող է լինել պատասխանատու և գործել լավագույն միջազգային փորձին համապատասխան:
ՀՀ բնապահպանության նախարար Արծվիկ Մինասյանն իր հերթին նույնպես նշանակալի համարեց և բարձր գնահատեց նախաձեռնությունը: Նրա ներկայացմամբ`«Ջերմուկ ազգային պարկի» ձևավորումը ոչ միայն կենսաբազմազանության զարգացման և պահպանման համար կստեղծի բավարար հիմք, այլ նաև նպատակաուղղված կլինի կառավարության ծրագրային քաղաքականության կարևոր ուղղություններից մեկի կյանքի կոչմանը:
«Կառավարության ծրագրերից մեկն ազգային պարկերի ընդլայնման քաղաքականությունն է: Շատ գնահատելի է, որ այս գործում «Լիդիան Արմենիա» ընկերությունը պատրաստակամություն է հայտնել: Սա լավ սկիզբ և հրաշալի հնարավորություն է, որպեսզի այլ մասնավոր հատվածներ նույնպես ներգրավվեն կառավարության կողմից իրականացվող նմանատիպ քաղաքականությանը: Սա նաև պատասխանատու վերաբերմունք է թե տարածաշրջանի, թե երկրի, թե ապագա սերունդների համար: Այս հուշագիր չի կաշկանդում ոչ ընկերությանը, ոչ նախարարությանն իրենց լիազորություններն ու իրավասությունները հ ավուր պատշաճի իրականացնելու համար»,- նշեց նախարարն` ընդգծելով, որ հուշագրում այդ մասին հատուկ շեշտվում է:
Նախարարը նաև հավելեց, որ հուշագրից բխում է, որ այն լինելու է առավելագույնս բաց ու մասնակցայինˋ չկաշկանդելով վերահսկող մարմնիˋ բնապահպանության նախարարության և հանքարդյունաբերող ընկերության այլ գործառույթները:
Treweek Environmental Consultants (TEC) բնապահպանական խորհրդատվական ընկերության փորձագետ, «Ջերմուկ ազգային պարկի» ծրագրի համակարգող Ռամազ Գոխելաշվիլին, ներկայացնելով նախագիծը, նշեց, որ այս հուշագրի ստորագրումը պատմական է ոչ միայն Հայաստանի, այլ նաև միջազգային տեսանկյունից:
«Ջերմուկ ազգային պարկի» ստեղծումը մեծ դեր ունի մարզային զարգացման համար: Բոլոր ներդրումներն ուղղվելու են օրինական ճանապարհով ազգային պարկ ստեղծելու գաղափարի իրագործմանը»,- ասաց նա` շեշտելով, որ այս հուշագիրը պետություն-մասնավոր հատված համագործակցության աննախադեպ փորձ է:
Գոխելաշվիլին նաև կարևորեց այն հանգամանքը, որ ազգային պարկի ստեղծման արդյունքում համայնքներին սպասվող սահմանափակումները փոխհատուցվելու են:
«Ջերմուկ ազգային պարկի» ստեղծման մտադրությունների հուշագիրը ստորագրեցին ՀՀ բնապահպանության նախարար Արծվիկ Մինասյանը և «Լիդիան Արմենիա» ընկերության գործադիր տնօրեն Հայկ Ալոյանը:
