Ուկրաինայի կառավարությունն ինտենսիվ կերպով բանակցություններ է անցկացնում Եվրամիության հետ՝ նախկին վարչապետ Յուլյա Տիմոշենկոյի ազատ արձակման վերաբերյալ: Այս մասին Ուկրաինայի առաջին փոխվարչապետ Սերգեյ Արբուզովը հայտնել է գերմանական Frankfurter Allgemeine Zeitung պարբերականին:
Արբուզովը հայտնել է, որ երկրի իշխանությունները Եվրախորհրդարանի հատուկ պատվիրակներ Փեթ Կոքսի և Ալեքսանդեր Կվասնևսկու հետ բանակցում են նաև Տիմոշենկոյին Գերմանիայում բուժելու հնարավորության վերաբերյալ: Նա նշել է, որ այդ հարցում կողմերն առաջընթաց են գրանցել:
Առաջին փոխվարչապետի խոսքերով՝ Ուկրաինայում չկան կալանավորներին արտերկրում բուժելու իրավական նախադրյալներ, այդ իսկ պատճառով անհրաժեշտ է խորհրդարան մտցնել համապատասխան օրինագիծ՝ այդ խնդիրն օրենքի շրջանակում լուծելու համար:
Այսօր արդարադատության նախարար Ելենա Լուկաշի նախագահությամբ կառավարությունում կկայանա առաջին «կլոր սեղանը», որի ժամանակ կքննարկվեն Վենետիկյան հանձնաժողովի և ԵԱՀԿ ժողովրդավարական ինստիտուտների ու մարդու իրավունքների հարցերով գրասենյակի խորհուրդները՝ Ուկրաինայի սահմանադրությունում փոփոխություններ կատարելու վերաբերյալ:
