«Առաջին լրատվական»- ի զրուցակիցն է «Հանրապետություն» կուսակցության նախագահ Արամ Սարգսյանը:
– Պարոն Սարգսյան, հուշագրում կետով նշված էր, որ երեք կուսակցությունները Հայաստանի ապագան տեսնում են որպես եվրոպական մոդելի պետություն, այնուամենայնիվ մնում է «Քաղաքացիական պայմանագրի» ոչ այնքան կտրուկ դիրքորոշումը Ռուսաստանի մասով, և այն, որ ԵՏՄ-ից դուրս գալը․ այդպիսի կտրուկ փոփոխությունները կարող են վնաս լինել Հայաստանի համար: Հետաքրքիր է՝ սա հետագայում խորհրդարանում տարբեր քվեարկությունների ժամանակ չի՞ խանգարի Ձեզ:
– Բացարձակապես՝ ոչ, որովհետև, եթե նայենք զուտ քվեարկություններին ու խորհրդարանում ասված տեսակետներին, ապա Նիկոլ Փաշինյանը դեմ է եղել ԵՏՄ-ին Հայաստանի անդամակցելուն, և կողմ է եղել ԵՄ-ի հետ Ասոցացման համաձայնագրի ստորագրմանը:
Այս փաստաթուղթը ստորագրել է նաև «Քաղաքացիական պայմանագիր»-ը՝ Սասուն Միքայելյանի ղեկավարությամբ: Եվ այս խնդիրը շատ-շատ է քննարկվել մեր քննարկումների ժամանակ, ակնհայտ է, որ «մետ»-ություն ասվածը՝ արևմտամետ, իշխանամետ… այս խնդիրը հորինել են իշխանությունները և «մետ»-երի են բաժանել մեզ, իրենց համար ՀՀԿ-ից դուրս բոլորը կամ արևմտամետ են, կամ ռուսամետ են, միայն իրենք են հայ: Այս պիտակը կպցրել են, և այնքան են ասել, որ մենք ստիպված համակերպվել ենք դրա հետ: Մեր դաշինքը մի խնդիր ունի լուծելու, մեր խնդիրը Հայաստանի, որպես պետության, պետական շահը ներկայացնելն է, Հայաստանի պետության շահերից ելնելով՝ գործընկերներ, բարեկամներ և համախոհներ ունենալն է, համապատասխան իրավիճակներում համապատասխան գերտերությունների հետ մեր շահերը համադրելն է, ոչ թե թշնամանալը, և այս առումով կարող ենք ասել, որ փոխլրացնող ինչ-որ բան էլ կա, և այստեղ ես տեսնում եմ, որ ընդհանուր պետության զարգացման մոդելի առումով մենք ընդհանուր հայտարարի եկած, ստորագրած փաստն ունեք, որ թե՛ «Քաղաքացիական պայմանագիր», թե՛ «Հանրապետություն», թե՛ «Լուսավոր Հայաստան» կուսակցությունը փորձելու են իշխանության գալու պարագայում Հայաստանը դարձնել եվրոպական մոդելի պետություն, եվրոպական արժեքներով՝ իհարկե դա համադրելով մեր ազգային սովորություններին ու բնույթին:
– Պարոն Սարգսյան, խոսքը իշխանության գալո՞ւ մասին է, և արդյո՞ք դա հնարավոր է, թե՞ խորհրդարանում երկրորդ քաղաքական ուժը լինելու մասին է:
– Բացարձակ նման խնդիր չի դրվում՝ մենք գնում ենք, որ խորհրդարանում երկրորդ քաղաքական ուժ լինենք, իմաստ չկար նման խնդիր դնելու: Մենք մտնում ենք ընտրապայքարի մեջ, այս երկրում իրական փոփոխություններ բերելու համար, որովհետև հասկանում ենք, որ այս իշխանությունն իր փող աշխատելու մոլուցքով ու փողով իշխանությունը պահելով՝ երկիրը հասցրել է ծայրաստիճան իրավիճակի, և եթե փոփոխություններ չլինեն առաջիկա ընտրություններում, իրական համակարգային փոփոխություններ չլինեն, ապա մենք կանգնած ենք մեր պետության, պետականության կորստի առաջ, և այս առումով հակված ենք ռեալ գործընթացների, ռեալ քայլերի:
– Հետընտրական զարգացումներ ենթադրվո՞ւմ են արդյոք: Ժողովուրդը դրա փորձն էլ ունի, դուք էլ եք նշել, որ հիմնականում ժողովուրդը ոտքի է կանգնում համապետական ընտրություններից հետո և հիասթափվում, տուն է գնում:
– Հետընտրական գործընթացներ չեն կարող լինել միայն մի պարագայում, եթե այս իշխանությունները կազմակերպեն արդար ընտրություններ, որ մարդը տեսնի, որ ինքը եկել, իր քվեն տվել է, և իր քվեն հաշվի են առել, չեն կեղծել, իր վրա ճնշում չեն բանեցրել, իշխանությունը չի կիրառել իր ադմինիստրատիվ ռեսուրսը, իրեն ենթակա ուժային ռեսուրսները, փող չի բաժանել, այս դեպքում, իհարկե, հետընտրական պրոցեսներ չեն լինի, հետևաբար մենք էլ փողոց դուրս չենք գա, եթե մարդ չլինի: Բայց, եթե իշխանությունը նորից խախտումների գնա, նորից արհամարհի ժողովրդին, այդ ժողովուրդը հրապարակ է դուրս գալու, և մենք, մեր սովորության համաձայն, մեր ժողովրդի կողքին ենք լինելու, ինչը իմ կարծիքով՝ շատ ավելի իրատեսական է, քան այն, որ իշխանությունները ընտրությունները չեն խախտի:
– Պարոն Սարգսյան, մեկ կուսակցություն դառնալու մասին նախկինում «Քաղաքացիական պայմանագիր»-ը նշում էր, որ պետք է բոլոր կուսակցությունները լուծարվեն և միանան իրենց, արդյո՞ք լինելու է «Հանրապետություն» և «Լուսավոր Հայաստան» կուսակցությունների լուծարում, և ի՞նչ սկզբունքով է այդ մեկ ուժի ձևավորումը լինելու:
– Գիտեք, նախ համաձայնագրում գրված է, որ մեզ կարող են միանալ նաև այլ ուժեր, և մեկ ուժ դառնալը կվերաբերվի նաև այդ ուժերին, այստեղ խնդիրը հանրության առաջ ավելի հեռահար խնդիրներ և նպատակներ դնելու առումով է, և ես համարում եմ, որ դա ուժեղացնում է մեզ, ուժեղացնում է նաև Երևանի քաղաքապետի ընտրություններին միասնական մասնակցելը, հավատացեք, մենք շատ լուրջ ենք մոտենում այս գործընթացին, և սա լրջության նշան է, և եթե մենք կուսակցություն դառնանք, դա նշանակում է, որ ոչ միայն «Հանրապետություն», «Լուսավոր Հայաստան» կամ «Քաղաքացիական պայմանագիր» կուսակցությունները, կամ դաշիքնի մեջ մտած այլ նոր կուսակցությունները պիտի լուծարվեն ու նոր անունով, մեկ կուսակցություն դարձած հանդես գան, դա ժամանակի ընթացքում, թիմերի համատեղ աշխատանքի ընթացքում կարող է իրականություն դառնալ: Ես շատ ուրախ կլինեմ, որ դաշինքն ունենա նման հաջողություններ, որ թիմերում լինի այնպիսի ոգևորություն, որ թիմերն այնքան մերվեն իրար հետ աշխատելուն, որ դա դառնա օրվա պահանջարկի խնդիր: Ես կարծում եմ, որ այո, եթե մենք միևնույն ընդդիմադիր գործունեությունն ենք ծավալում, ես չեմ կասկածում, որ «Լուսավոր Հայաստան»‑ի, ոչ «Քաղաքացիական պայմանագրի»՝ Հայաստանի մասով իրական փոփոխությունների գնալու ցանկությանը, հետևաբար մեր նպատակը մեկն է, անկախ նրանից, որ տարբեր մոտեցումներ ունենք: Քանի որ մեր նպատակը մեկն է, մենք կարող ենք միասնական հանդես գալ: Իսկ տարբեր մոտեցումները, վստահեցնում եմ Ձեզ, որ շատ բան լրացնում են, շատ բան սովորեցնում են: Ես քաղաքական դաշտում նոր մարդ չեմ, արդեն 15 տարի է այստեղ եմ, շատ-շատ մարդկանց հետ եմ բանակցել, շատ-շատ կուսակցությունների մոտեցումներ եմ լսել, բայց այս վերջին մեր զրույցները, այս համագործակցությունը շատ ավելի բան տվեց ու հարստացրեց անձամբ ինձ (չգիտեմ ընկերներիս ինչպես), քան մինչև այդ եղածն էր: Կար ռեալ բանավեճ, կային մոտեցումներ, և ամեն կողմը փորձում էր իր մոտեցումը հիմնավորել՝ իր առավելություններով ու թերություններով: Եվ եթե կային հարցեր, որոնց ես փակ աչքերով էի նայում, ինձ համար աքսիոմա էր, ես սկսեցի այդ ուղղությամբ մտածել, ինչը շատ դրական եմ համարում:
– Պարոն Սարգսյան, նույնիսկ ՀԱԿ դաշինքով մասնակցելու ընթացքում Դուք կարևոր չեք համարել ցուցակում բարձր տեղ զբաղեցնելը, հետաքրքիր է, այս դեպքում կա՞ նման քննարկում, կա՞ արդեն որոշում այն մասին, թե որ քաղաքական ուժի ներկայացուցիչն է գլխավորելու ցուցակը:
– Հավատացնում եմ, որ քննարկել ենք ամեն-ամեն ինչ, բացի՝ ով, որտեղ, ինչ: Վստահաբար ասում եմ՝ թիմում ոչ մեկը դա չի կարևորել: Այլ բան ենք կարևորում. իրական արդյունքներ գրանցելը, և այդ հարցը քննարկվելու է ավելի շահավետ գործընթաց ծավալելու, երևալու առումով, հաշվի են առնվելու բոլոր անհատների պլյուսներն ու մինուսները, և ըստ դրա էլ ձևավորվելու է ցուցակ: Իհարկե, դա քննարկման թեմա է դառնալու, բայց վստահաբար ասում եմ Ձեզ, որ դաշինքում ներկայացվածները բոլորն էլ ունակ են, և հակված են զիջումների, ես ինքս կարող եմ առաջին զիջողը լինել:
