Վրացական Apsny.ge կայքի փոխանցմամբ, վրացական ընդդիմության ակցիաների թույլատրման ժամկետը սպառվում է մայիսի 26-ին։ Հենց այդ օրը Թբիլիսիի Ռուսթավելի պողոտայում կայանալու է Վրաստանի անկախության օրվան նվիրված ռազմական շքերթը։
Ակնկալվում է, որ դրանից մեկ օր առաջ Վրաստան են ժամանելու նախկին Պաշտպանության նախարար Իրակլի Օքրուաշվիլին և «Վրացական կուսակցության» գլխավոր ֆինանսիստ Կոտե Գոգելիան։
Թբիլիսիի քաղաքապետարանը հայտարարել է, որ ընդդիմությունը հայտ է ներկայացրել մայիսի 21-25-ը ակցիաներ անելու համար։ Հետևաբար, մայիսի 26-ին ընդդիմության յուրաքանչյուր ակցիա կհամարվի ապօրինի։
Դա հաստատել է նաև Վրաստանի ՆԳՆ տեղեկատվական-վերլուծական դեպարտամենտի ղեկավար Շոթա Ուտիաշվիլին. «Մինչև մայիսի 25-ը ներառյալ` ընդդիմությունը բողոքի ակցիաներ անցկացնելու իրավունք ունի և եթե այդ ընթացքում Բուրջանաձեն օրենք չխախտի, ՆԳՆ-ը որևէ ուժ չի կիրառի»։
Հիշեցնենք, որ արդեն նշվում է, թե Իրակլի Օքրուաշվիլին Փարիզից ժամանել է Սոչի և պատրաստվում է մայիսի 25-ին Աբխազիայի տարածքով մուտք գործել Վրաստան։