«Առաջին լրատվական»-ի զրուցակիցն է ԱԺ փոխխոսնակ, ՀՀԿ մամուլի խոսնակ Էդուարդ Շարմազանովը:
–Պարոն Շարմազանով, Կարեն Կարապետյանը ՀՀԿ-ի մասին ասել է. «Ես նկատել եմ իրենց մեջ առաջին հերթին ցանկություն՝ փոխվելու և փոխելու. կստացվի՞, ժամանակը ցույց կտա, բայց դրա անհրաժեշտությունը կա»: Ինչպիսի՞ն են հանրապետականները, որ պետք է փոխվեն:
-Հանրապետականների և առհասարակ մեր քաղաքական ուժերի, քաղաքական համակարգի, հասարակության փոփոխության անհրաժեշտության մասին դեռևս փետրվարի 12-ին շատ հստակ նշել է մեր հանրապետության նախագահն իր ծրագրային ելույթում, և փոփոխության անհրաժեշտությունը եղել է մինչ այդ: Այդ փոփոխության անհրաժեշտությունն է մեզ հանգեցրել սահմանադրական բարեփոխումների գաղափարին: Սահմանադրական բարեփոխումներից հետո (ի դեպ՝ այսօր սահմանադրական բարեփոխումների մեկամյակն է, շնորհավորում եմ այդ կապակցությամբ) մենք ապրում ենք որակապես այլ Հայաստանում… Փոփոխությունների անհրաժեշտությունը չի եկել միայն վարչապետի ծրագրից: Փոփոխության անհրաժեշտությունը բնական անհրաժեշտություն է մեր պետության, մեր հասարակության համար, որն ուրվագծել է ՀՀ և ՀՀԿ նախագահ Ս. Սարգսյանն իր ծրագրային ելույթում, և այն, ինչ անում է հիմա Կարեն Կարապետյանի կառավարությունը, նախագահի ծրագրային թեզերի տրամաբանական շարունակությունն է:
-Հնարավո՞ր է, որ Կարեն Կարապետյանը նկատի ունի այն, որ ՀՀԿ-ն ունի ցածր վարկանիշ՝ ինչպես պնդում է ընդդիմությունը:
-Ես Ձեզ կխնդրեի ընդդիմությանը հորդորեիք՝ իրենք իրենց վարկանիշի մասին խոսեին և չափեին իրենց վարկանիշը… Սեփական աչքի գերանը տեսնելու փոխարեն նրանք մատնանշում են ՀՀԿ-ի աչքի փուշը: Հանրապետականն իր աչքի փուշը շատ լավ տեսնում է, և դրա համար այն հանելու անհրաժեշտությամբ և Ժողովրդի մատից փուշ հանելու անհրաժեշտությամբ գնում է փոփոխության:
–Ի՞նչն եք ուզում փոխել, կեղծի՞քը, թալա՞նը…
-Ուզում ենք փոխել որակը՝ և՛ ադյունավետ կառավարման, և՛ մտածողության:
-Այսինքն՝ մոլախոտը շա՞տ էր:
-Չեմ խոսի ոչ կոռեկտ բառապաշարով: Հիշեցի Էնշտեյնի միտքը. «Մեզ անհրաժեշտ է նոր մտածողություն, որպեսզի լուծենք խնդիրները, որոնք հին մտածողության արդյունք են: Յուրաքանչյուր ժամանակաշրջան ունի իր արդիական մտածողությունը և քայլերը, որոնք ավելի արդյունավետ են տվյալ ժամանակաշրջանում: Պառլամենտական համակարգը բոլորովին այլ պահանջներ է դնում: Ուժեղ է այն անձը, այն քաղաքական ուժը, որը տեսնում է իր թերությունները:
-Թերություններից մի քանիսը կնշե՞ք:
-Բազում են՝ կոռուպցիան, արդարության դեֆիցիտը, ոչ արդյունավետ կառավարումը… Այդ թերությունների մասին ՀՀ նախագահը խոսել է ՀՀԿ 16-րդ համագումարում և նշել է, որ զարգացման տեմպերը և առկա իրավիճակը մեզ չեն բավարարում: Մենք պետք է նոր գործիքներ ներդնենք, նոր ճանապարհներով գնանք՝ հասնելու մեր նպատակին: Մեր հիմնարար նպատակը ուժեղ Հայաստանի կառուցումն է՝ ուժեղ՝ մտքով, բազկով, հավատով, պրոֆեսիոնալ կադրերով և ուժեղ իր քաղաքացիներով, ովքեր կհավատան, որ Հայաստանում կա արդարություն, կա ազատ մրցակցություն…
–Պարոն Շարմազանով, արդեն լրանում է նոր կառավարության գործունեության 100-րդ օրը: Ի՞նչ դրական քայլ եք արձանագրել: Կարապետյանն ասում է, որ հնարավոր չէր այս կարճ ժամանակահատվածում ստվերի դեմ լուջ պայքար տանել: Կառավարության որևէ դրական քայլ այսօր քաղաքացին չի կարող նշել:
-Քաղաքական և տնտեսական բարեփոխումները 1 օրում, 100 օրում և նույնիսկ 6 ամսում տեսանելի չեն լինում: Եվ Կարեն Կարապետյանի կարճաժամկետ խնդիրն այն է, որ նրա կառավարությունը հույս ներշնչի և հիմք ստեղծի ապագա բարեփոխումների համար: Ըստ իս, Կարապետյանը և իր թիմը կարողանում են հաջողությամբ լուծել խնդիրը: Ժողովրդավարական համակարգը դանդաղ շտապելու մեխանիզմ է, ժամանակ է անհրաժեշտ: Եթե վարչապետը «սուպերմեն» էլ լիներ, հնարավոր չէր, նույնիսկ Ռուզվելտի՝ նոր կուրսի քաղաքականությունը երկրորդ- երրորդ տարում է սկսել պտուղ տալ, մեզ մոտ ինչպե՞ս կարող էին 100 օրվա ընթացքում երևալ դրական պտուղները, առավել ևս, որ մենք մտնում ենք նախընտրական փուլ:
Հարցազրույցն ամբողջությամբ՝ տեսանյութում:
