Ռուսական RIA Novosti լրատվական գործակալության փոխանցմամբ՝ ՆԱՏՕ-ի ու ԵՄ-ի անդամ երկրների արտգործնախարարներն այսօր Բրյուսելում անցկացված նիստի ժամանակ հավանության է արժանացրել անվտանգության ու պաշտպանության ոլորտում երկկողմ համագործակցության ընդլայնման ավելի քան 40 նախագծերի փաթեթը։
Այդ մասին հայտարարել է ՆԱՏՕ-ի գլխավոր քարտուղար Յենս Սթոլթենբերգը։ Վերջինս հանդիպման բացման ժամանակ ընդգծել է.
«Մենք հավանության ենք արժանացնում առաջարկների այդ փաթեթը՝ համատեղ հայտարարություններն իրագործելու համար, որոնք ես այս տարվա հուլիսին Վարշավայում ստորագրել եմ Եվրախորհրդի նախագահ Դոնալդ Տուսկի ու Եվրահանձնաժողովի ղեկավար Ժան-Կլոդ Յունկերի հետ։
Խոսքը նոր մակարդակի ձգտումների ու մեր ունակությունների ուժեղացումն է՝ արձագանքելու համար այն մարտահրավերներին, որոնց հետ մենք բախվում ենք խաղաղություն ու կայունություն պահպանելիս։
Կազմակերպություններից (ԵՄ և ՆԱՏՕ) ոչ մեկն էլ միայնակ չի տիրապետում այդ առաջադրանքների լուծման համար անհրաժեշտ գործիքակազմին։ Սակայն աշխատելով համատեղ՝ մենք ազդեցիկ ուժ ենք՝ հանուն բարության»։
