Facebook-ը, Twitter-ը, YouTube –ն ու Microsoft-ը հայտարարել են միավորման մասին՝ իրենց կայքերով ծայրահեղական կոնտենտի տարածման դեմ պայքարի համար։ Ինչպես հայտնում է RIA Novosti-ն, այդ մասին ասված է ընկերությունների համատեղ հայտարարությունում։
Դրա համար վեբ-հսկաները սկսում են նախկինում ծայրահեղական բնույթի ճանաչված և իրենց պորտալերից ջնջված լուսանկարների և տեսանյութերի «թվային մատնահետքերի» փոխանակություն։
«Մեր սպառողական ծառայություններում տեղ չկա կոնտենտի համար, որը նպաստում է ահաբեկչության առաջխաղացմանը։ Երբ մեզ հայտնում են այդ մասին, մենք արագ գործողություններ ենք ձեռնարկում ընդդեմ նման կոնտենտի՝ համապատասխան յուրաքանչյուր ընկերության քաղաքականության»,-ասված է փաստաթղթում։
Արդյունքում կստեղծվի նման «մատնահետքերի» ընդհանուր բազա, որի գործարկումը նշանակված է 2017 թվականի սկզբին։
