Տեղեկատվական անվտանգության փորձագետ Սամվել Մարտիրոսյանի հավաստմամբ՝ նույնիսկ եթե Լեռնային Ղարաբաղի հարցին լուծում տրվի, հաքերային հարձակումները շարունակվելու են: Նա «Առաջին լրատվական»-ի հետ զրույցում ասաց, որ հաքերները շատ դեպքերում զուտ սպորտային հետաքրքրության համար են կայքեր կոտրում: Պատահել է, որ հայկական կայքերը ինդոնեզիական հաքերներ են կոտրել:
Հաքերային վերջին հարձակումների վերաբերյալ նա ասաց, որ ադրբեջանցիները գտել էին մի քանի կայք արտադրող կազմակերպության ծրագրային ապահովման մեջ խոցելիություն և դրանից օգտվելով՝ կոտրել էին այդ կազմակերպության արտադրած կայքերը: Սա արդեն կազմակերպության պատասխանատվության ոլորտն է, և միանշանակ որևէ գնահատական տալը շատ բարդ է: Նրա հավաստմամբ՝ մենք ունենք պաշտպանված պետական կայքեր, որոնք գտնվում են Ազգային անվտանգության ծառայության տեսադաշտում, ուստի անհանգստանալու առիթ քիչ կա: Նույնը չի կարելի ասել Արցախի կայքերի մասին, որոնք գտնվում են անվերահսկելի գոտում և հաճախ են ենթարկվում հաքերային հարձակումների:
Նրա մեկնաբանությամբ՝ այսօր բացի պետական կայքերից, շատ արժեքավոր ինֆորմացիա ունեն նաև մասնավոր կայքերը, օրինակ՝ լրատվամիջոցները կամ Կենտրոնական բանկի կայքը. «Պետությունը կարող է հսկել պետական հատվածը, սակայն մասնավոր հատվածը հնարավոր չէ: Պատկերացրեք՝ քաղաքում գողություններ են լինում: Տարբեր տներ կան, և ամեն մեկն իր չափով է պաշտպանում տունը: Արդեն կայքի տերը պետք է մտածի պաշտպանվածության մասին»:
Նա շեշտեց, որ լրատվամիջոցները հանդիսանում են ռազմավարական նշանակության օբյեկտներ, և եթե դրանք կոտրեն, անխուսափելի են անցանկալի հետևանքները. «Եթե խոշոր կայք կոտրեն և ապատեղեկատվություն տեղադրեն, պատկերացնո՞ւմ եք՝ ինչ կլինի այդ կայքն ընթերցող լսարանի հատվածում: Սակայն որքանո՞վ գոհ կլինի տվյալ կայքը, եթե դրա բոլոր հոսքերը լինեն ազգային անվտանգության հսկողության տակ: Ինձ թվում է՝ կայքը դեմ կլինի դրան: Իրականում յուրաքանչյուր մասնավոր կայք ինքն իրեն պետք է պաշտպանի»:
Մեր զրուցակիցն ասաց նաև, որ վերջին շրջանում հասարակական հնչեղություն ունեցող մի շարք մասնավոր կայքեր սկսել են զբաղվել իրենց անվտանգությամբ, սակայն դեռևս շատ են այնպիսիները, որոնք հնարավոր է հեշտությամբ կոտրել:
Լուսանկարը՝ PanARMENIAN Photo-ի
