2007 թվականից Երևանի պետական համալսարանում գործող Եվրոպական ուսումնասիրությունների գիտաուսումնական կենտրոնը, 2010թ. հոկտեմբերին հաղթելով Եվրամիության կողմից հայտարարված մրցույթում, հնարավորություն է ստացել իրականացնել Եվրամիության կողմից ֆինանսավորվող մագիստրոսական ծրագիր։ «Մարդու իրավունքներ և ժողովրդավարացում» ծրագիրը, որի բյուջեն կազմում է 1,300,000 եվրո, ԵՄ միակ ծրագիրն է Արևելյան գործընկերության տարածաշրջանում։
ԵՊՀ Եվրոպական ուսումնասիրությունների գիտաուսումնական կենտրոնը ծրագրին մասնակցում է՝ Ուկրաինայի, Բելառուսի, Մոլդովայի ազգային համալսարանների հետ միասին, սակայն հանդիսանում է ծրագրի կենտրոնը։
Եվրոպական ուսումնասիրությունների գիտաուսումնական կենտրոնի հիմնադիր, իրավաբանական գիտությունների թեկնածու, դոցենտ Արթուր Ղազինյանը տեղեկացնում է, որ «Մարդու իրավունքներ և ժողովրդավարացում» մագիստրոսական ծրագրի համար կա 30 անվճար տեղ, որից 25-ի դեպքում կենտրոնը հոգում է նաև կացության և ճանապարհորդական ծախսերը։
«Չկա ազգային պատկանելության հիմքով որևէ սահմանափակում։ Ուսանողները կարող են դիմել Արևելյան գործընկերության տարածաշրջանի բոլոր երկրներից»,- ասում է Արթուր Ղազինյանը։
Մագիստրատուրայի ծրագրին դիմելու վերջնաժամկետը հունիսի 1-ն է։ Հայտեր ներկայացնելու համար հարկավոր է բակալավրատի դիպլոմ, անգլերենի իմացության TOEFL քննության ցուցանիշ և մոտիվացիոն նամակ։
«Ընդունելության համար առաջնահերթ կարևորություն են ներկայացնում ոչ միայն դիմորդի ավարտական գնահատականները, այլև մոտիվացիոն նամակը, քանի որ ֆակուլտետի ուսանողը պետք է լինի ժողովրդավարության և մարդու իրավունքների պաշտպանության ոլորտի նվիրյալ գաղափարախոս և հանդիսանա եվրոպական արժեքների կրող։ Առաջին հերթին ինքն իրեն պետք է եվրոպացի համարի»,- կարևոր է համարում Արթուր Ղազինյանը։