Հայաստանի որոշ խանութներում այսուհետ կարելի է գտնել նոր, ավելի օգտակար հացատեսակ՝ «Սելիմյան հաց» անվանումով, որը, ինչպես նշեցին նորարարության հեղինակները, ոչ միայն չի վնասում առողջությունը, այլ դրական ազդեցություն է ունենում ինքնազգացողության վրա:
Այս հացատեսակի բաղադրատոմսի հեղինակները և դրա արտադրության մասնակիցները այսօր լրագրողներին ներկայացրեցին նոր հայկական հացատեսակի առանձնահատկությունները, ինչպես նաև արտադրության հետ կապված որոշ խոչընդոտներ:
Ի տարբերություն մյուս հացամթերքների, որոնք, ըստ մասնագետների, պարունակում են տարբեր արհեստական հավելումներ, ինչը հացաթխման շուրջ 8-ժամանոց գործընթացը կրճատում է և դարձնում մեկ ժամից մի փոքր ավել՝ այդ կերպ վնասելով առողջությանը՝ առաջացնելով չբերություն, գաստրիտ, ուռուցքային հիվանդություններ, «Սելիմյան հաց»-ը բացառապես պարունակում է բնական միջոցներ՝ հացի թեփ, կաթնային շիճուկ և ածիկ:
Նոր հացատեսակի բաղադրատոմսի հեղինակ կենսատեխնոլոգ, ՀՏԱ ակադեմիկոս Ալեքսանդր Սելիմյանի փոխանցմամբ, այս նորարարությունն արդեն Ռուսաստանում և Ուկրաինայում սերտիֆիկացվել է: Ավելին` Ռուսաստանում մեծ գումարներ են ներդնում, շուրջ 10 տոննայանոց գործարան են հիմնադրել այս հացատեսակի արտադրության համար:
Սելիմյանը նշեց, որ երբ հետազոտությունները վերջնական ավարտին հասցրին, իրենք բոլորին՝ պետական կառույցներին, ինովացիոն ընկերություններին սկսեցին բացատրել նոր, օգտակար հացատեսակի առանձնահատկությունները, աջակցություն խնդրել այն տարածելու, զարգացնելու համար, սակայն որևէ մեկը դրան ուշադրություն չի դարձրել, ինչից հետո մի քանի ընկերներով նախաձեռնել են փոքրիկ գիտաարտադրական տեղամաս և փոքր քանակով սկսել արտադրել, «որպեսզի ցույց տան վերևներին, կողքերին, ժողովրդին, որ կարելի է անվտանգ, բնական հաց արտադրել»:
«Արդեն հոգնել եմ, թե՛ փող ունեցողներից, թե՛ պետությունից, թե՛ պետական մարմիններից»,- ասաց Սելիմյանն ու նշեց, որ նույնիսկ պատրաստվում են մի քանի հաղորդաշար նկարահանել, որտեղ մարդկանց կցուցադրվեն թե՛ հացի պատրաստման եղանակները, թե՛ հումքը:
«Կռուփ» ընկերության տնօրեն Խաչիկ Ստամբոլցյանը, ով նույնպես մասնակցել է «Սելիմյան հացի» ստեղծմանը, մտահոգություն հայտնեց.
«Մեր նպատակը հացաթխումը չի, մեր նպատակն է ցույց տալ, որ այս տեխնոլոգիայով կարող ենք մաքուր հաց թխել ու մատակարարել մեր ժողովրդին, մեր երեխաներին, զինվորներին»: Նա նաև ասաց, որ ի նկատի ունենալով բանակում զինծառայողներին տրվող հացի որակը, մի քանի տարի շարունակ դիմել են Պաշտպանության նախարարությանը, սակայն միշտ մերժում են ստացել:
Խաչիկ Ստամբոլցյանից փորձեցինք ճշտել, թե ինչ պատճառաբանությամբ են մերժել զինվորների համար գնել այս հացատեսակը, երբ այն իր ինքնարժեքով ավելի մատչելի է խանութներում վաճառվող սովորական հացից և էկոլոգիապես ավելի մաքուր. ու մինչ Ստամբոլցյանը փորձում էր անուղղակիորեն ներկայացնել այդ պատճառները, Սելիմյանը միջամտեց. «Ոլորտը կոռումպացված է: Էդ ասա ու պրծի էլի»:
Ավելացնենք, որ այս նորարարությունը դեռ պաշտոնապես գրանցված չէ, ինչը, բանախոսների տեղեկացմամբ, ևս ֆինանսական մեծ միջոցների հետ է կապված:
